Сииттэбит кэрэ аҥардарын көмөлөрүнэн, бу күннэргэ герой ийэлэрбит сырдык ааттарыгар оноһуллубут үчүгэйкээн сквербытыгар 200 — тэн тахса сибэкки арааһын субботниктааммыт бука бары биир киһи курдук түмсэн үөрэ — көтө олортубут.
Бу күн Мария Сивцева, Марфа Новгородова сиэн оҕолоро эбэлэрин скверыгар ис сүрэхтэриттэн кэлэн күүс — көмө буолтара инникитин холобур эрэ буолар. Ити курдук нэһилиэкпит олохтоохторугар анаан, хараҕы үөрдэр, сүрэҕи сылаанньытар кэрэ миэстэлэрбитин харахпыт харатын курдук харыстаан, ыраастаан, өтөхсүйбэтин туһугар көрөр — истэр бары эбээһинэспит буоларын өйдүөх тустаахпыт.
Махтаныахпыт этэ 60, 70 саастарыгар дылы ис сурэхтэриттэн нэһилиэктэрин көхтөөх тэрээһиннэригэр, инники сайдыытыгар, кэскил ыччаттарбытыгар үтүө холобур буолар эйэҕэс эбээлэрбитигэр Мотрена Васильеваҕа, Мария Обутоваҕа, Анна Сивцеваҕа, Татьяна Герасимоваҕа, Людмила Поповаҕа, Мария Степановаҕа, Наталья Гуляеваҕа, Надежда Ермолаеваҕа улахан махталбытын тиэрдэбит. Сыл аайы Кыайыы скверыгар эмиэ бэйэлэрин күүстэринэн сибэкки олордон киэркэтэллэрэ олус кэрэ. Быйыл Россияҕа дьиэ кэргэн сылыгар анаан Мотрена Васильева улахан кыыһынаан Марианна Захаровалыын уонна тапталлаах кырачаан сиэннэрин кытта дьиэ кэргэнинээн, бэйэлэрэ арассаадалаабыт кэрэ — нарын сибэккилэрин тилэри олордон, скверы симээн — киэркэтэн кэбистилэр. Кылгас самаан сайыммыт үтүө күннэрин былдьаһан, айылҕабыт анаабыт мааны күннэрин былдьаһа — тараһа аҕыйах хонугунан сибэккилэрбит барахсаттар бөһүөлэкпит кэрэ миэстэлэрин киэркэтиэхтэрэ, симиэхтэрэ диэн астынабыт, дуоһуйабыт. Өссө төгүл субботникка сылдьыбыт дьоммутугар ис сүрэхтэн махтанабыт
Марианна Сивцева