Билигин ханнык баҕарар нэһилиэк чөл олоҕу өрө тутан, анал бырагыраамалары, бырайыактары суруйан, ким баҕалаах дьарыктанарыгар сөптөөх стадионнарын, былаһааккалары оҥорон, дойдуларын дьоно эт-хаан өттүнэн чиргэл туруктаах буолалларыгар күүһүн-уоҕун ууран туран үлэлиирин хас биирдии олохтоох киһи киэн тутта сыаналыыр. Сииттэ нэһилиэгэр анал футбольнай, дьарыктанар былаһаакканы инники сылларга баһылыктаан олорон Галина Лебедева саҕалаабыта.
Кэнники бу үлэлэри ситэрэн-хоторон биэрбит баһылыктарынан Айсен Захаров уонна билигин баһылыгынан
ситиһиилээхтик үлэлии олорор Семен Тимофеев буолаллар. Быйылгы сылга биир улахан үөрүүбүтүнэн, инники суруйбуппут курдук, таһырдьа турар тренажердар буолаллар, быйыл күһүҥҥүттэн дьон-аймах эрчиллэн барбыттара. Нэһилиэкпит киэн туттар тириэньэрдэрэ, спортсменнара биһиги нэһилиэккэ элбэхтэр. Ол курдук уонтан тахса сыл волейбол оонньуутун өрө тутан, өрөспүүбүлүкэ, улуус хас да төгүллээх чемпионнарын иитэн таһаарбыт, Сииттэ орто оскуолатын учууталын Иннокентий Охлопковы киэн тутта ааттыыбыт. Сииттэ нэһилиэгин эрчимнээх эдэр ыччатын лидера Федор Петров, олохтоохтору түмэн араас интэриэһинэй, сытыы киирсиилээх, көхтөөх күрэхтэһиилэри тэрийэр. Бу ыытыллар күрэхтэһиилэргэ дьону түмээри, олохтоох дьаһалта баһылыга сыаналаах бириистэри туруоран дьону көҕүлүүрэ, түмэ тардара хайҕаллаах суол. Быйыл нэһилиэкпит өрөгөйдөөх үбүлүөйүгэр анаан улахан өрөспүүбүлүкэтээҕи күрэхтэһиилэр үрдүк таһымҥа буолан аастылар. Бу барыта олохтоох дьон көмөтүнэн тэриллибитин бэлиэтиэхпин баҕарабын. Сылы быһа ыытыллыбыт үлэлэрбит түмүктэринэн, өрөспүүбүлүкэтээҕи «Спорт — норма жизни» күрэхтэһиигэ кытынныбыт, чөл олоҕу өрө тутар 100 нэһилиэк кыттыбытыттан 30 иһигэр киирэммит, сэттис бочуоттаах миэстэҕэ тигистибит. Онон Сииттэ нэһилиэгэ өрөспүүбүлүкэ финалистарын кэккэтигэр киирдибит. Анал тэрээһиҥҥэ баһылыкпыт Семен Тимофеев СӨ спорка миниистирэ Леонид Спиридоновтан анал кубогы уонна махтал суругу үөрэ — көтө тутта. Ити курдук нэһилиэкпит тугунан тыынан олорорун барытын сырдатан, олохтоох «Дабаан» хаһыатынан, араадьыйанан, «Саха» НКИК ханаалынан, ватсабынан барытын бириэмэтигэр ааҕа-билэ олорорбут олохпут аныгы ирдэбилэ буолар. Өссө төгүл дойдум дьонун ситиһиилэринэн эҕэрдэлиибин, кэккэ дабайыылар кэлэ турдуннар.
Марианна Сивцева.