Сииттэҕэ култуура дьиэтин иһинэн тэриллибит «Сайдыс» лааҕырбытыгар, «Эйэҕэс эбээ, минньигэс сиэн» диэн бэртээхэй, көрдөөх оонньуулардаах күрэххэ нэһилиэкпит алта көхтөөх эбээтэ, сиэн оҕолорунаан кытыыны ылан олус сэргэхсийэн, ис сүрэхтэн сынньанан, махтанан бардылар.
Ол курдук, эйэҕэс эбээлэрбит, минньигэс тапталлаах сиэннэринээн Лидия Винокурова Арсенийынаан, Евдокия Винокурова Алешатынаан, Александра Ющенко Виаленатынаан, Людмила Попова Дарханынаан, Марфа Александрова Айааллынаан, Ольга Попова Алинатынаан көрдөөх күрэхтэргэ кыттаннар, бырааһынньыкпытын өссө ордук киэргэттилэр. Кыттааччыларбытыгар олохтоох култуура дьиэтин үлэһиттэрин ааттарыттан улахан махталбытын тиэрдэбит.
Тэрээһиммит үөрүүлээх арыллыытын эҕэрдэ ырыаларынан, хоһооннорунан саҕалаатыбыт. Ол курдук, оҕолорбут флешмоб үҥкүүннэн арыйдылар. Итии — истиҥ эҕэрдэ ырыаларын ис сүрэхтэриттэн тириэртилэр лааҕырбыт кырачаан кыттааччылара Алгыстаана Никитина уонна Алина Попова. Ньургустаан Никитин, Дима Охлопков суруйбут «Төрөөбүт Сииттэм» диэн хоһоонун дорҕоонноохтук ааҕан көрөөччүлэр биһирэбиллэрин ылыан ылла.
Күндү ыалдьыттарбытыгар иэйиилээх эҕэрдэ, ырыа бастыҥын тириэртилэр Евдокия Шарина уонна Евдокия Охлопкова. Көрөөччүлэрбитигэр анаан минньигэс тортаах, утахтаах бырааһынньыктааҕы остуол тартыбыт. Эбээлэрбит астына — дуоһуйа, сэттэ түһүмэхтээх күрэххэ көхтөөхтүк кыттаннар, олохтоох дьаһалта туруорбут бэртээхэй бириистэрин тутаннар олус астыннылар. Кинилэргэ анаан, олохтоох дьаһалта баһылыгын солбуйааччыта Петр Степанов эҕэрдэ тыл бастыҥын тириэртэ, эбээлэр барахсаттар олоххо саамай күндү дьон буолалларын өссө төгүл туоһулаата, дьолу, доруобуйаны баҕарда.
Маны таһынан олохтоох култуура үлэһиттэрин ааттарыттан, кырачаан кыттааччыларга минньигэс тортары бэлэх уунан, махталбытын тириэртибит. Оҕолорбут тэрээһин түмүгэр сир сибэккитин хомуйан, тапталлаах дьонноругар бэртээхэй букеттары бэлэх оҥорон ууннулар.
Марианна Сивцева