Нэһилиэкпитигэр Улуу Кыайыы 80 сылын көрсө улахан суолталаах, дьоһун тэрээһин буолан ааста. Улуу Кыайыыны уһансыбыт биир дойдулаахтарбытыгар, кинилэр эйэлээх олоҕу түстээбиттэригэр, ис сүрэхтэн махтанан туран, төрөөбүт төрүт дойдуларыттан сэриигэ аттаммыт сирдэригэр «Мэҥэ таас» аһыллар үөрүүлээх күнэ буолан ааста.
Суолта уурар улахан тэрээһиммитигэр көхтөөх кыттыыны ыллылар Сииттэ нэһилиэгин баһылыга Семен Тимофеев, уоттаах сэрии кэмин оҕото Борис Иннокентьевич Иванов, Сииттэ орто оскуолатын дириэктэрэ Андрей Новгородов, Чурапчы көһөрүллүүтүн «Утум» бөлөх салайааччыта, олохтоох библиотека сэбиэдиссэйэ Мария Обутова, республикаҕа, улууска биллэр, кыраайы үөрэтэччи Анна Сивцева, Сииттэ орто оскуолатын лидера Виолетта Сергеева. Тэрээһиммитин иилээн — саҕалаан, салайан ыыттылар эдэр ыччаттарбыт, олохтоох дьаһалта исписэлииһэ Мария Захарова, Сииттэ орто оскуолатын учуутала Захар Кривошапкин.
Тэрээһиммитигэр бастатан туран нэһилиэкпит киэн туттар аҕыс орденнаах улуу буойуттарбытыгар аналлаах композицияны, сценарийы сурукка тистэ Сииттэ орто оскуолатын географияҕа учуутала, элбэх кинигэ автора, нэһилиэкпит убаастанар киһитэ Анна Лазаревна Сивцева. Композицияны уустаан — ураннаан аахтылар, олохтоох дьаһалта баһылыгын солбуйааччыта Петр Степанов, Роман Попов, Ольга Левина, Мария Яковлева, Мария Захарова, Захар Кривошапкин, ахсыс кылаас үөрэнээччилэрэ Коля Павлов, Ира Гуляева.
Өйдөбүнньүк мэҥэ таас туруутугар үлэлэстилэр олохтоох дьаһалта баһылыктара Семен Тимофеев, Петр Степанов, тыа хаһаайыстыбатын исписэлииһэ Дмитрий Колмогоров, Гаврил Слепцов.
Үйэ — саас тухары өлбөт-сүппэт, хас биирдии киһи өйүгэр — санаатыгар өрүү сөнөн сылдьарын туһугар, ыччат дьоммутун патриотическай тыыҥҥа иитэр инниттэн, кэриэстээһин тэрээһиннэр ыытылаллара, билиҥҥи кэмҥэ наадалаах суол. Сииттэбит сиэдэрэй сиригэр, инникитин бар дьоммут, ыччаттарбыт төрөөбүт Ийэ дойдуларын хара хааннаах халабырдьыттарыттан көмүскээн, олохторун толук уурбут эһэлэрбитин, убайдарбытын, биир дойдулаахтарбытын кэриэстээн ааһар, бастыҥ миэстэ буоларыттан олус үөрдүбүт.
Тэрээһиҥҥэ кыттыыны ылбыт «Чуораанчык» детсад коллективыгар (сал. ОльгаАлександрова), Сииттэ орто оскуолатын үөрэнээччилэригэр (сал. Людмила Попова), » Алаһа» эбээлэр кулууптарыгар (сал. Мотрена Васильева) улахан махталбытытын тиэрдэбит.
Марианна Сивцева