Бүгүн алтынньы 1 күнүгэр Сииттэбит нэһилиэгэр «Олохпут көмүс күһүнэ» диэн Аҕам саастаах дьон күннэрин бэлиэтээтибит. Эбээлэрбит тэрийбит сандалы остуол тула олорон ирэ-хоро сэһэргэһэн, үөрэ- көтө ыллаан- туойан бырааһынньык саҕаланна. Тэрээһиҥҥэ нэһилиэкпит баһылыга Семен Тимофеевич Тимофеев олохтоох дьаһалта аатыттан эҕэрдэтин тиэртэ, кылгастык үлэтин хамнаһын сэһэргээтэ. Итини сэргэ Дьиэ-кэргэн сылынан нэһилиэкпит ытык кырдьаҕас ыалыгар, үлэ бэтэрээннэригэр Вера Григорьевна уонна Николай Дмитриевич Павловтарга юбилейнай знак туттарда. Улуус сэбиэтин депутата Софья Денисовна Николаева эҕэрдэтин тиэртэ уонна аҕам саастаах дьон боппуруостарыгар сиһилии эппиэти биэрдэ.
Бу күн эҕэрдэлэрин тиэртилэр оскуола үөрэнээччилэрэ Самира Налыйдырова, Надя Сметанина (сал. Л. Попова), «Алаһа» эбээлэр түмсүүлэрэ (сал. М.Л. Васильева), нэһилиэк Аҕа сүбэтин сал. Н. Захаров, ФАП үлэһитэ Т.В. Герасимова, М. Обутова, Е.Охлопкова. Покровскайтан ыалдьыттыы кэлэ сылдьар ыалдьыттарбыт У.Е. Лебедева уонна Лидия Спиридоновна бэйэлэрин сэмэй эҕэрдэлэрин Сииттэ олохтоохторугар тиэртилэр. Олохтоох библиотека үлэһитэ Мария Степановна Обутова кинигэ быыстапкатын, бэсиэдэ, оонньуу тэрийэн ыытта. Эбээлэрбит эдэрдэрин санаан үҥкүүлээн эргийдилэр, ыллаан эйээрдилэр.
Ити курдук, эбээлэрбит үөрэн-көтөн, сэргэхсийэн, махтанан бардылар. Тэрээһини тэрийэн ыытта олохтоох кулууп үлэһитэ Евдокия Охлопкова.
Мария Обутова, Сииттэ нэһилиэгэ.