Сииттэ нэһилиэгэр оҕуруот олордон тото -хана бэйэ бородууксуйатынан аһыыр-сиир дьиэ кэргэн элбээбитин бэлиэтиибит. Оҕуруот олордон үрдүк үүнүүнү ыларга оҕолорун үөрэтэллэрэ хайҕаллаах суол. Инникитин олохторугар олус наадалаах буолара биллэр. Ол курдук, быйылгы сайыммыт өлгөм үүнүүнү бэлэхтээтэ. Элбэх, үрдүк хаачыстыбалаах от бэлэмнэммитэ, биир дойдулаахтарбыт үөрэн-көтөн туран бэлиэтииллэр.
О5уруот үлэтин толору баһылаабыт хаһаайкаларынан бэлиэтиэхпин баҕарабын Наталья Левинаны, Светлана Левинаны, Анна Тимофееваны, Мотрена Васильевнаны, Варвара Уваровскаяны, Лидия Винокурованы, Вера Павлованы өрүү холобур оҥостобут, сүбэ биэрэр үтүө сүбэһиттэрбитинэн буолаллар. Кинилэртэн үөрэнэн сатабыллаах эдэр оҕуруоччуттарбыт, аныгы үйэни толору баһылаан соҕуруу дойду үүнээйитин толору баһылаабыт эдэркээн ийэлэрбитин үөрэн-көтөн туран ааттыахпын баҕарабын Марианна Захарованы, Августина Александрованы, Анастасия Парникованы, Валентина Кондратьеваны онтон да атыттар. Ити курдук бу ыарахан кэмнэргэ бэйэ бородууксуйатынан нэһилиэкпит олохтоохторо астына-дуоьуйа аһаан олороллоруттан сүрдээҕин үөрэллэр, астыналлар.
Аны туран кылгас сайыммытын сибэкки эгэлгэ ыһыаҕынан тэлгэһэлэрин киэргэтэллэрэ үгэскэ кубулуйда. Маны таһынан сквердэрбитин сыл аайы хайаан да үллэстэн сибэккиннэн симиибит, киэргэтэбит. Бу курдук Сииттэбит сатабыллаах Далбар хотуттара бары өттүн баһылаан олороллоруттан киһи сүргэтэ көтөҕүллэр, санаата сылаанньыйар. Тымныы кыһын ортото сайыҥҥы куйаас күннэрин, өлгөм үүнээйилэрин саныахтара, санаалара көтөҕүллүө.
Марианна Сивцева
Хаартыскалары ааптар тиксэрдэ