Быйыл, Сиэгэн-Күөл орто оскуолатыгар, тыйаатыр үлэтин, алтынньы ыйга саҕалаабыппыт. «Оскуола театра» уруок таһынан дьарыкка, иккис, үһүс, бэһис, алтыс кылаас оҕолоро сырыттылар.
Бастакынан, сылдьар оҕолору барыларын мунньан кэпсэтии буолбута. Театр буолабыт, онон, дьон көрүүтүгэр, ханнык эбит айымнньыттан туруоруу наада диэн быһаарыстыбыт. Кыра кылаастар, ордук остуоруйаҕа охтоллор эбит. Ортолор — мааска, таҥас оҥоһуллуутун ыарахаттарын ырытар дьон буолан биэрдилэр. Ол гынан, бары испиктээкилгэ кыттар баҕаларын эттилэр.
Иккиһинэн, тугу туруорабыт, ханнык айымньыны диэн боппуруос үөскээтэ. Хас да остуоруйаны ыйытан көрдүм, дьонум аахпатахтар да, саатар мультигын да көрбөтөхтөр. Онтон, толкуйдаан баран, улуу Пушкин айымньыларын, хайаан билиэхтэрэ суоҕай диэн, ону токкоолостум. Хата, дьонум билэр буолан үөртүлэр. Саамай аахпыт, истибит, көрбүт «Балыксыт уонна балык туһунан остуоруйаны» таллылар. Оҕолор, ис хоһоонун өйдөрүгэр сөргүтэ таарыйа, уочаратынан аахтылар. Остуоруйа быһа кэпсээнин эрэ буолбакка ис суолтатын быһаарыстылар.
Үсүһүнэн, оруол үллэстиитэ буолла. Кытаанах үллэрии диэтэҕиҥ, бэйэтэ туспа остуоруйа. Дьарыкка сылдьар оҕолор бары хабыллалларын курдук, оруол, хамсаныы толкуйдааһына, эмиэ туспа интэриэһинэй үлэ. Ону барытын, оҕолору кытта кэпсэтэн, сүбэлэһэн оҥордубут.
Төрдүһүнэн, төрөппүттэри кытта үлэ. Төрөппүттэрбит наһаа маладьыастар, оҕолоругар таҥас-сап тигэн, кытталларыгар өйөөн, хайҕаллаах дьыаланы оҥордулар.
Бэсиһинэн — ханна, хаһан көрдөрөбүт диэн боппуруос үөскээтэ. Хата, ити бириэмэҕэ, Өрөспүүбүлүкэтээҕи тирэх киин “Саха сирин кэнчээри ыччата” конкурсун балаһыанньата тиийэн кэллэ. Инньэ гынан, остуоруйабытын, «Маска-2024» күрэххэ анаан уһуллубут. Нэһилиэк сынньанар киинин директора А.А. Иванова тэрилтэтин дьиэтин көҥүллээн, сыана таҥаһын сөптөөх дьүһүҥҥэ уларыта охсон, аппаратуратын туран биэрэн абыраан, махталбытын ылла.
Хаһан баҕарар буоларын курдук, бэлэмнэнии бириэмэтэ, ордук интэриэһинэйдик, бэһиэлэйдик ааста. Оҕолор, оруолларыгар олус кыһамньылаахтык, эппиэтинэстээхтик сыһыаннастылар. Сүрүн устааһыҥҥа, дьиҥнээх артыыстар курдук киирэллэрин тахсалларын, декорация уларыйыытын эҥин, барытын бэйэлэрэ дьаһаннылар. Оҕолорум маладьыастар, өссө да кытта туруохтара диэн эрэнэбин.
Ханнык баҕарар тэрээһин дьоно суох тэриллибэт, соҕотох киһи кыайбат. Спектакль туруорарбытыгар сүрүн көмө күүһүнэн буоллулар төрөппүттэр уонна эдэр коллегаларым – Э.И. Гоголева, А.С. Жирков, В.А. Четвертакова, В.П. Петрова. Маладьыастарым, сүүрэн-көтөн, устан, хаартыскаҕа түһэрэн, сыана хартыынатын, музыкатын дьаһайан, артыыстары гримнээн, көмө бөҕөтө буоллулар.
Бу курдук, быйылгы үөрэх дьылыттан, оскуолабыт театра, конкурстарга кыттар, бастакы хардыыларын саҕалаата.
Валентина Николаевна Алексеева, Сиэгэн Күөл орто оскуолатын история, обществознание предметтарын учуутала, «Оскуола театрын» салайааччыта.
