Сииттэбит сиэдэрэй сиригэр Кыайыы күнүн көрсө бэтэрээннэрбитигэр анаан, араас көмөлөр, болҕомтолор уурулла туралларыттан киһи сүргэтэ көтөҕүллэр.
Ол курдук, сыл аайы Сииттэ орто оскуолатын ахсыс кылааһын үөрэнээччилэрэ (кылаас салайааччыта Захар Кривошапкин) шефтэһэр Вера, Николай Павловтарга күүс — көмө буолан абырыыллар. Бу да сырыыга баран баанньыктарын маһын барытын саһааннаан, туруоран биэрдилэр. Вера, Николай Павловтар быйыл бииргэ ыал буолан олорбуттара 60 сылларын үөрэн — көтөн туран бэлиэтээбиттэрин туһунан суруйан турабыт. Кинилэр алгыс тыллара, махталлара кэнчээри кэлэр ыччаттарга алгыс буолан арыаллыы сылдьыа диэн эрэнэбит. Оҕолору минньигэс аһынан күндүлээн, үөрүүлэрэ үгүс.
Ити курдук, оҕолорбут кыамматтарга, кырдьаҕастарга амарах дууһаҕытын өрүү бэлэхтии туруоххут диэн эрэнэбит.
Марианна Сивцева.