Кэбээйи оскуолатын 1970 сыллаахха бүтэрбиттэр “Сырдатар-үөрэтэр” диэн ааттаах бырайыакпыт чэрчитинэн улууспут нэһилиэктэригэр – оскуолаларга араас хайысхалаах тэрээһиннэри ыытабыт. Сахабыт сирин саамай кэрэ сардаана сибэккитэ тыллан турар кэмигэр,бииргэ үөрэммит доҕорбут мелодист, педагог-музыкант, СӨ култууратын үтүөлээх үлэһитэ, Саха сирин мелодистарын Ассоциациятын бэрэссэдээтэлэ, элбэх норуокка анаммыт бырайыак ааптара Алексей Калининскай-Луҥха Өлөксөйүгэр Ил Дархан ыйааҕынан норуодунай артыыс аата иҥэриллибитин чиэстээн төрөөбүт дойдутугар Куокуйга «Музыка нөҥүө дойдуга бэриниилээх, патриоттары иитии“ диэн бырайыак оҥорон баран кэллибит.
Манна кытынныбыт бииргэ үөрэммит үөлээннээхтэрэ:Аксиния Обутова, Алексей уонна Светлана Местниковтар, Матрена Левина, Александра Борисова Дьокуускайтан, Валентина Иванова Кэбээйиттэн. Бу күннэргэ күүстээх тыал түһэн, Сииттэтээҕи доҕотторбут кыайан кэлбэтилэр.
Бэс ыйын 25 күнүгэр Куокуйдааҕы «Угуйаан» култуура уонна сынньалаҥ киинигэр (директор Илларионова Н.В.) истиҥ көрсүһүү тэрилиннэ. Көрсүһүү Алексей Калининскай Николай Осипов тылларыгар “Сэргэх дьоммор эҕэрдэ” диэн ырыатынан ааптар толоруутунан саҕаланан кэлбит дьону түмэ тарта. «Луҥха долгуннара» түмсүү эбээлэрэ ыалдьыттары эҕэрдэ үҥкүүнэн көрүстүлэр. Көрсүһүүгэ Куокуй оскуолатын “Витаминка” лааҕырын оҕолоро, лааҕыр салайааччылара, нэһилиэк олохтоохторо кытыннылар. Кэлбит дьон Луҥха Өлөксөйү-Алексей Кириллович Калининскайы айар үлэтэ сайда турарынан уонна үрдүктүк сыаналанарынан, дьон-сэргэ билиниитиныларынан эҕэрдэлээтилэр, Куокуй орто оскуолатын үөрэнээччилэрэ аатырбыт биир дойдулаахтарын туһунан чинчийэр үлэлэрин билиһиннэрдилэр: Иза Семенова (9кыл.) «А.К.Калининскай төрөөбүт Куокуйугар таптала», Ян Жергин (11 кыл.) «А.К.Калининскай биир дойдулаахтарынайымньыларын үйэтитээччи уонна тарҕатааччы», Вадим Игнатьев (10 кыл.) «Алексей Калининскай саха суруйааччыларын кытта ситимэ». Чахчы да үөлээннээхпит бииртэн биир кэрэ истиҥ ырыалара истээччи дууһатын долгутар, умсугутар эйгэлээхтэр. Көрсүһүүгэ кэлбит дьон Луҥха Өлөксөйө илдьэ кэлбит үлэтин сырдатар бэрт дириҥ ис хоһоонноох быыстапка матырыйаалларын кытта билистилэр. Олохтоох дьаһалта баһылыга Лев Николаевич Павлов Алексей Кириллович дойдутун кытта ситимин сайыннарар саҥа бырайыагынан, айар үлэтэ үрдүктүк сайдан киэҥ эйгэҕэ билиниллэринэн эҕэрдэлээтэ. Оҕо сааһын доҕоро, кыраайы үөрэтээччи, «Дабаан» хаһыат уопсастыбаннай кэрэспэдьиэнэ Геннадий Васильевич Иванов төрөөбүт Куокуйун кэрэ айылҕатын түһэрбит хаартыскаларын бэлэх уунна.
Күн иккис аҥарыгар Алексей Кириллович маастар-кылаас ыытта. Тэрээһин кыттыылаахтара бары кини баяҥҥа доҕуһуолунан «Сэргэх дьоммор, эҕэрдэ!» ырыаны үөрэтэн ыллаатыбыт, бэрт истиҥ ис хоһоонноох ырыа диэн бары сэргээтибит. Маастар кылааһыгар Луҥха Өлөксөйө наардаан бэлэмнээн аҕалбыт ырыаларыттан биирдии күпүлүөттэри иһитиннэрдэ, хайдах айыллыбыттарын кэпсээтэ. Кини ырыаларын кытта төрөөбүт дойдуга, сирдээҕи олоххо таптал кыымнара саҕыллан истилэр. Ааптар салгыы ырыаларын таайтаран оонньотто уонна ыллатта. Оскуола оҕолоро биир дойдулаахтарын ырыаларын билэллэриттэн Алексей Кириллович сөхтө уонна олус үөрдэ. Биһиги иннибитигэр тахсан уолаттар хас да ырыаны ыллаатылар. Үлэлэрин билиһиннэрэн кэпсээбит оҕолорго Сайа саҥа тахсыбыт ырыанньыгын бэлэхтээтибит, бу хомуурунньукка Алексей Калининскай хас да ырыата киирбит.
Маастар кылаас түмүгүнэн улуус үөрэҕин салаатыгар А.К. Калининскай ырыаларын улуус оскуолаларыгар муусука уруоктарын бырагыраамматыгар киллэрэн үөрэтэргэ, сайыҥҥы өттүгэр оҕолорго аналлаах ырыа лааҕыра аһыллара буоллар диэн этиилэрбитин киллэрэр баҕа санаалаахпыт.
Алексей Кириллович ырыаны айарын таһынан ырыаҕа тапталы сайыннарарга-үөскэтэргэ утумнаахтык үлэлиир – ырыанньык таһаарар, көмөлөһөр, үйэтитэр, Саха сиригэр Ырыа күнүн төрүттэстэ уонна дойдутугар Павел Соловьевтылыгар, Виталий Андросов мелодиятыгар «Сибэкки биһикки» ырыаҕа анаан “Сибэкки диһикки” духуобунас скверин (2010 сыл) туттарбыта. Бырайыак былаанынан бу сквергэ оҕо-аймах, нэһилиэк олохтоохторо сынньана сылдьан ырыа иһиттиннэр, үөрэттиннэр диэн икки QR—код оҥоттордубут (биирин оскуолаҕа, биирин Сибэкки скверигэр). Бу күннэргэ турар сирдэригэр тиксэриллиэхтэрэ.Биһиги баҕа санаабыт – Сквергэ кэлбит дьон кодунан көрөнталбыт ырыаларын истиэхтэрэ, ыллыахтара. Маастар-кылааһы саха дьоно бары сөбүлээн ыллыыр Иван Гоголев тылыгар, Алексей Калининскай мелодиятыгар «Барыта үчүгэй» диэн ырыанан тумуктээтибит.
Сарсыныгар Дьандыкаан аартыгар — сардааналаах кырдалбытыгар тиийдибит. Быйыл сардаана хайа да улууска өлгөмнүк үүммүт диэн суруйаллар. Биэрэккэ мотуорбут тиксээтин кытта иннибитигэр кэрэ көстүү — сардааналаах кырдал! Бары да сүрдээҕин үөрдүбүт да, долгуйдубут да. Сорохторбут сардаана маннык элбэхтик үүнэн турарын олохторугар аан маҥнай көрөн сөхтүлэр, махтайдылар! Маннык көстүүнү үйэ аҥара анараа өттүгэр эмиэ манна Куокуйга, аҕам төрөөбүт дойдутугар пионерскай лааҕырга үлэлии сылдьан көрбүтүм. Сардаана сибэкки ийэ айылҕатыгар үүнэн турара хатыламмат кэрэ көстүү. Дьоҕурдаах дьон сатыылларынан киһиэхэ иҥэн долгутар айымньыларын айар буоллахтара:
Ол иһин кэрэҕэ
Үйэттэн-үйэҕэ
Саҥалыы айыллар
Аналлаах эбиппит.
Кэрэчээн сибэкки уонна эн биһикки (Г.Кобяков тыла, А. Калининскай мелодията)
Саһан сыппыт сардаана
Миэхэ көстөн мичээрдэ,
Күндү дойдум Куокуйум
Иэйиититтэн бэристэ (М. Спиридонова тыла, Т. Тихонова мелод сылията)
Татыйык талахтан
Ырыата дьырылыыр,
Сардаана кырдалтан
Сандаара тырымныыр (И. Петров тыла, В. Новиков мелодията).
Сардааналыын көрсөн, кэрэлиин алтыһан, дуоһуйа сынньанан баран дойдубутугар кэллибит.
Бу айаммытыгар көмөлөспүт нэһилиэк аҕа баһылыга Лев Николаевич Павловка, кини солбуйааччытыгар Илья Васильевич Семеновка, энтузиаст кыраайы үөрэтээччиНина Егоровна Олесоваҕа, Геннадий Васильевич уонна Павел Данилович Ивановтарга, култуура улэһиттэригэр, мотористарбытыгар Иннокентий Васильевич Дьяконовка улахан махталбытын тиэрдэбит. Төрөөбүт тапталлаах Куокуйгут сайдарыгар таһаарыылаахтаах үлэлээҥ, бэйэҕит кылааккытын киллэриҥ.
Биир дойдулаахпыт, үөлээннээхпит А.К. Калининскай—Луҥха Өлөксөйүн ырыалара олоххут аргыһа буоллун.
Кэбээйи оскуолатын 1970 с. бүтэрбиттэр ааттарыттан Валентина Иванова
Хаартыскаҕа Нина Олесова түһэриитэ (айан түгэннэрэ кулуупка, сквергэ, сардааналаах кырдалга)