Оҕо саас сылын чэрчитинэн Иван Егорович Левин аатынан Танара орто оскуолатын үөрэнээччилэрин икки ардыларыгар Ырыа, Үҥкүү Фестивала буолан ааста.
Фестиваль икки сүһүөҕүнэн сыаналанна. Ол курдук, хас биирдии кылааас олус долгуйан, үөрэн-көтөн, өрө көтөҕүллэн туран кытынна.
Бу ырыа, үҥкүү киэһэтин сыаналаатылар элбэх оҕолоох дьиэ кэргэн күн күбэй ийэтэ, үҥкүүһүт — Виктория Германовна Афанасьева, Оҕо искусство оскуолатын уһуйааччыта — Татьяна Ивановна Абрамова, «Дайан» СК салайааччыта — Каролина Борисовна Кудрина.
Кыайыылаахтары быһаарар долгутуулаах түгэҥҥэ алын сүһүөх кылаастарга — тэҥнэһии үөрүүтүн 2 уонна 3 кылаастар үһүс миэстэ буолан үллэһиннилэр. Иккис миэстэни 1 кылаас үөрэнээччилэрэ ылан сөхтөрдүлэр. Маҥнайгы миэстэни барытыгар эппиэтинэстээхтик, чаҕылхайдык туттан-хаптан кыттыбыт 4 кылаастар ылан өрөгөйдөөтүлэр.
Орто уонна үрдүкү сүһүөх кылааастарга үһүс миэстэҕэ тэбис тэҥ сыанабылы ыланнар 5 уонна 10 кылааастар таҕыстылар. Онтон 6 уонна 7 кылааастар иккис миэстэни ылан үөрүү кынаттаннылар. Кыайыылаах аатын биир киһи курдук, биир тыынынан уурбут-туппут курдук таҥнан, сыанаҕа тутта-хапта сылдьыыларынан, көрөөччүгэ ырыаны, үҥкүүнү тиэрдиилэринэн 8 кылаас үөрэнээччилэрэ ыллылар.
Хас биирдии кылааска үөрэнэр талааннаах оҕолору иилээн — саҕалаан түмэр, үөрэтэр-такайар кылаас салайааччыларыгар, уһуйааччыларга махтанабыт. Бу киэһэ кэлбит көрөөччү күннээҕи түбүгү умнан оҕолорбут ыллыыр ырыаларын алыбар ылларан, үҥкүүлэрин ытылҕаныгар уйдаран тарҕастылар.
Оҕолорбут барахсаттар талааннара сырдык, аптаах сыанаҕа өссө да тахсан, арыллан истин!
Вера Прокопьева