Олоҥхо ыһыаҕар бэлэмнэнии тэтимнээхтик барар

Сииттэ нэһилиэгэр олохтоох дьаһалта баһылыга Семен Тимофеев, администрация үлэһиттэрэ, ону кытта тэрилтэ, түөлбэ салайааччылара, олохтоох нэһилиэк депутаттара, түмсүү салайааччылара кыттыылаах кэлэр сылга Кэбээйибит улууһугар Олоҥхо ыһыаҕар уонна Кыайыы 80 сылыгар аналлаах сүбэ мунньаҕа буолан ааста. Ол курдук хас биирдии нэһилиэктэргэ 300 олбоҕу, 100 чаппарааҕы тигэн бэлэмниирбитигэр, былырыын улуустан дьаһал ылан олоробут. Бу улахан улэлэр, хамсааһыннар быйылгы сылы көтүппэккэ са5алыырбыт хайаан да наадалааҕын ыйдылар.

Олохтоох дьаһалта быһаарыытынан, бу сылга «Алаһа» эбээлэр түмсүүлэригэр, сахалыы соннору, ону кытта 4 кыыска, 4 уолга сахалыы таҥастары тиктэрэргэ диэн былааннаатылар. Бу ииһи — күүһү барытын бэйэбит кыыспыт Тина Хатылыкованы кытта дуогабардаһан, хамсааһын саҕаланыахтаах. Кэлэр ый диэки Тина кэлэн меркаларын ылаттыахтаах, ол кэннэ иис үлэтэ күүстээхтик саҕаланыахтаах. Олбох уонна чаппараах тигиитин тэрилтэннэн, түөлбэннэн үллэстэн тигэргэ сүбэлэстибит. Аҕа сүбэтэ уһанар уолаттары, эр дьоннору түмүөхтээх.

Маны таһынан Сииттэбит сиригэр «Үйэтитии» сыла биллэриллибитинэн киэҥ хабааннаах үйэтитии үлэлэрэ ыытыллыахтаахтарын туһунан былааннары, сүбэлэри, этиилэри иһиттибит. Олоҥхо ыһыа5ар уонна Кыайыы 80 сылыгар аналлаах тэрээһиҥҥэ анал хамыыһыйалар тэрилиннилэр. Аны ый аайы туох хамсааһын барбытын, барыахтааҕын туһунан, түмсэн сүбэлэҥ мунньаҕын тэрийэргэ диэн уураах ылынныбыт.Онон Сииттэбит олохтоохторун ыҥырыа этибит, ыытыллар бары тэрээһиннэргэ, үлэлэргэ көхтөөх кыттыыны ылыаххыт диэн эрэнэбит.

Марианна Сивцева