Бу ый 26 күнүгэр биһиги түмэлбитигэр Гуманитарнай чинчийиилэр институттарын научнай үлэһитэ Ньургун Михайлович Иванов-Ньургун Багдарыын кэлэн үлэлээн барда.
Эрдэ болдьоспуппут быһыытынан, биһиги олохтоох кыраайы үөрэтээччилэри Павлов Егор Авксентьевиһы уонна Эверстов Илья Ильиһи ыҥыран, Ньургун Багдарыыны кытта көрсүһүүнү тэрийдибит. Ыалдьыппыт сүрүн сыала-соруга диэн Кэбээйи сирдэрин ааттарын хомуйан, ону сурукка-бичиккэ киллэрии эбит. Олохтоох кэпсэтии, чуолкайдааһын түмүгэр үгүс сирдэр – күөллэр, алаастар, өтөхтөр ааттара сурукка тиһилиннилэр.
Кэпсэтии кэнниттэн Ньургун Михайлович түмэл экспонаттарын сиһилии көрдө-иһиттэ, сэргээбит малларын хаартыскаҕа түһэрэн ылла, бэйэтигэр бэлиэтэннэ.
Ньургун Багдарыын биһиги түмэлбит тэриллиитигэр кини төрөппүт аҕата М.С. Иванов- Багдарыын Сүлбэ (оччолорго Кэбээйи орто оскуолатын дириэктэринэн үлэлии олорон) олук уурбутун туһунан түмэл дириэктэрэ Г.К. Егоров эппитин истэн, соһуйда да, үөрдэ да. Ол курдук оскуола иһинэн түмэл тэрийэр туһунан 1958 с. ыам ыйын 9 күнүгэр 56 №-дээх дириэктэр бирикээһэ тахсыбыт. Кэлин бу оскуола түмэлигэр олоҕуран, биһиги П. Д. Степанов аатынан улуустааҕы кыраайы үөрэтэр түмэлбит тэриллибитэ. Ыалдьыппыт аҕатын бирикээһин куопуйатын ылан, олус астынна, махтанна уонна хардатын бэйэтин дьиэ кэргэнэ иитэр ыҥырыаларын мүөтүн биһиэхэ утары бэлэх уунна.
Иосиф Кобяков, түмэл сүрүн харайааччыта.