Биhиги нэhилиэкпитигэр тɵрɵɵн-үɵскээн, улаатан Саха сиригэр киэҥник биллибит биир дойдулаахпыт, оскуолабыт выпускнига, Арассыыйскай Федерация, Саха Өрөспүүбүлүкэтин искусствотын үтүɵлээх деятэлэ, Арассыыйа худуоhунньуктарын Сойууhун чилиэнэ, «Гражданскай килбиэн» знак кавалера, СӨ норуодунай худуоhунньуга, Кэбээйи улууhун, Сииттэ нэhилиэгин бочуоттаах олохтооҕо Николай Николаевич Попов аатын изо, технология кабинетыгар иҥэрии үɵрүүлээх күнэ буолан ааста.
Николай Николаевич олоҕуттан кылгастык билиһиннэрэр буоллахха:
Кини 1947 сыллаахха бэс ыйын 2 күнүгэр Сииттэ нэһилиэгэр төрөөбүтэ. 1971 сыллаахха А.И. Герцен аатынан Ленинградтааҕы государственнай педагогическай институт художественнай-графическай факультетын ситиһиилээхтик үөрэнэн бүтэрбитэ. Үөрэҕин бүтэрээт Намнааҕы педагогическай училищеҕа үлэтин саҕалаабыта. 1976 сылтан Дьокуускай куоракка А.С. Пушкин аатынан драматическай театр сүрүн худуоһунньугунан үлэлээбитэ, билигин бочуоттаах сынньалаҥҥа олорор.
Бу тэрээhиҥҥэ Кэбээйи улууhун салалтатыттан улуусбаhылыгын солбуйааччы Николай Докторов, нэhилиэкпит баhылыга Семен Тимофеев ыалдьыт буоллулар.
Тэрээhин сахалыы сиэринэн-туомунан саҕаламмыта. Эҕэрдэлэрин «Кэскил» ырыа ансаамбыла тиэрдибиттэрэ. «Тɵрɵɵбүт дойдум» хоhоонун Ньургустаан Никитин ааҕан иhитиннэрбитэ. Кабинеты арыйыыга кыhыл лентаны кырыйбыттара Николай Попов, Николай Докторов, Семен Тимофеев, оскуола директора Андрей Новгородов, изо уонна технология учуутала А.Г. Степанова.
Тэрээhин түмүгэр уопсай хаартыскаҕа түhүү буолбута уонна Николай Николаевич маастар кылаас ыыппыта.
Тɵрɵɵбүт дойдубутуттан тахсыбыт үтүɵ дьоммут кэлэн ити курдук биhигини кɵрсүhэллэрэ олус үчүгэй.
Айыына Попова – Сииттэ оскуолатын 10-с кылааhын үɵрэнээччитэ