Бу күннэргэ Кэбээйигэ «Мэхээлэчээн булчут» уус-уран киинэ 4 киһилээх айар бөлөҕө кэлэн үлэлээн барда. Бөлөҕү Улус Медиа үлэһитэ Зинаида Григорьева салайан аҕалбыт. Манна кинини сэргэ киинэ режиссера Александр Лукин, киинэ композитора Моисей Кобяков уонна оператор Эвелина Попова бааллар.
Айар бөлөх сүрүн сыалынан киинэ музыкальнай доҕуһуолун таҥыы, Кэбээйи ураты матыыптарын көрдөөһүн, үөрэтии уонна табыллар буоллаҕына ол матыыптары киинэҕэ туһаныы буолар. Бу сыралаах үлэни композитор М. Кобяков уонна режиссер А. Лукин Кэбээйи кэрэ эйгэтин оскуолатын үөрэнээччилэрин, учууталларын кытта икки күн устата дьаныардаахтык дьарыктанан, күнүс устубут запистарын түүннэри көннөрөн, таҥан ситиһиилээхтик түмүктээтилэр. Манна сыһыаран эттэххэ, бу улахан үлэ Кэбээйитээҕи П. Д. Степанов аатынан кыраайы үөрэтэр түмэл «Тимофей Сметанин балаҕана” диэн ааттанар тутуутугар ыытылынна.
Онтон З. Григорьева уонна Э. Попова суруйааччы Т. Е. Сметанин төрөөбүт, олорбут алаастарын кэрийэн Кэбээйи хатыламмат кэрэ көстүүлэрин киинэҕэ уһуллулар.
Түмүгэр айар бөлөх кыттыылаахтара Кэбээйи дьонугар-сэргэтигэр, Т. Е. Сметанин аймахтарыгар уонна П. Д. Степанов аатынан түмэл кэлэктиибигэр барҕа махталларын, алгыстарын этэн бардылар.
Иосиф Кобяков.