Мастаах сэлиэнньэтигэр аһаҕас бильярдка турнир буолан ааста. Бу күрэҕи Александр Петров оҕолоро, аймахтара, бииргэ үөрэммит доҕотторо, 2-с Лүүчүн администрацията Юрий Иванович Лепчиков сүүрэн-көтөн тэрийэллэр. Ону сэргэ бу күрэҕи кытта тэҥҥэ успуорт саалатыгар «Дартс»күрэх ыытылынна.
Дартска икки бөлөххө саастарынан арахсан күрэхтэстилэр. Саҥа көрүҥ буолан кыттааччы да элбэх. Дьэ,бильярды өрө туппут дьоммут, бильярдистарбыт ыраахтан, чугастан оонньууну оройуттан тутаары, кыайыы өрөгөйүн билээри кэлбиттэр. Ол курдук, Горнайтан, Бүлүүттэн, Дьокуускайтан, Кэбээйиттэн кэлэн кыттыыны ыллылар. Түөрт остуолунан Баҕадьаҕа, Мукучуга, Мастаахха икки остуолунан киэһэ хойукка диэри күөн -көрүстүлэр. Бу сырыыга кыттааччы ахсаана лаппа элбээбит, бильярд успуордун сэҥэрээччилэр да элбэхтэр. Мастааха бу күрэххэ уопсайа 52 киһи кытынна.
Икки күннээх тыҥааһыннаах бильярд күрэҕин кыайыылаахтара:
1 миэстэ — Гай Николаев, Бүлүү (Сыдыбыл).
2 миэстэ — Васильев. Бүлүү (Сыдыбыл).
3 миэстэ — Андрей Михайлов, Кэбээйи (Мастаах), Игорь Макаров, Бүлүү (Сыдыбыл).
Бильярды өр сылга өрө туппут бэтэрээн оонньооччу Николай Алексеевич Данилов (Кэбээйи) спецбирииһинэн наҕараадаланна. Наталья, Прокопий Григорьевтар спецбириистэрин Дьокуускайтан кэлбит биир соҕотох кэрэ аҥаарга бырааһынньыгынан хотуттан кэлбит тоҥ балыгынан Оксана Ионоваҕа үөрдэ- көтүтэ туттардылар.
Саҥа көрүҥ дартска хойукка диэри дротигынан быраҕаттаатылар. 2-с Лүүчүн аҕа баһылыга Юрий Лепчиков аныгыскы бильярд уонна дартс күрэҕэр күүскэ эрчиллэн бириистээх миэстэлэргэ тиксэллэригэр баҕарда. Икки күннээх үчүгэй оонньуулары көрдөрдүлэр. Кыайыылаахтарга кубок, мэтээл, харчынан сертификат туттарылынна.
Дартс күрэҕин кыайыылаахтара:
1 миэстэ — Владимир Колесов, Горнай (Аһыма).
2 миэстэ — Серик Жакипов (Мастаах).
3 миэстэ — Арсен Петров, Горнай (Аһыма).
Бэтэрээннэргэ:
3 миэстэ — Александр Егоров, Кэбээйи (Мукучу).
2 миэстэ — Афанасий Докторов (Кэбээйи).
1 миэстэ — Юрий Лепчиков (Мастаах).
Бүгүҥҥү күрэххэ ким бэлэмнээх, күүстээх санаалаах, тулуурдаах ол кыайыы өрөгөйүн биллэ. Кыайыылаахтары барыларын эҕэрдэлиибит. Аныгыскы күрэххэ өссө күүскэ бэлэмнэнэн, ох курдук оҥостон, кустук курдук куоһанан кэлэннэр сытыы киирсиилэри көрдөрүөхтэрэ диэн эрэнэбит.
Сардана Жакипова, Мастаах бөһ.