Ахсынньы 21 күнүгэр Сангаардааҕы ДЮСШ тэрийиитинэн волейболга оскуола оҕолорун күрэхтэһиитэ буолан ааста. Биир күн устата ДЮСШ спортивнай саалата оргуйан олордо, хотторуу кыһыыта-абата, кыайыы үөрүүтэ-көтүүтэ барыта баар буолла.
Физкултуура уонна маассабай спорт управлениетын исписэлииһэ Марк Васильев этэринэн, Сангаар спортивнай оскуолатын кубога оонньонно. «Кэбээйиттэн уолаттар, Куокуйтан уолаттар, кыргыттар, Сииттэттэн кыргыттар хамаандалара кэлбиттэр. Сангаардар иккилии уолаттар, кыргыттар хамаандаларын туруорбуттар. Хомойуох иһин, тыайалар сатаан кэлбэтэхтэр, Кэбээйи кыргыттарын хамаандата карантиҥҥа түбэһэн хаалбыттар. Онон уопсайа 8 хамаанда киирсэ сылдьар. Бары бэлэмнээхтэр, бу сезоҥҥа бастакы күрэхтэһиилэрэ. Тохсунньуга бу саастаах оҕолорго отборочнай күрэхтэһии буолуохтаах, оскуола оҕолорун спартакиадатыгар бэлэмнэнии саҕаланар. Оҕолорун өйөөн, тэрийэн ыыппыт төрөппүттэргэ, оскуола кэлэктиибигэр, олохтоох дьаһалталарга махталбытын тиэрдэбит».
Тириэньэр Анна Степановна Павлова
Тыҥааһыннаах киирсиилэр түмүктэннилэр. Кыргыттарга 1 миэстэни эрэллээхтик Куокуй кыргыттарын хамаандата ылла. 2 миэстэҕэ Сангаар бастакы хамаандата таҕыста, 3-һү Сииттэ хамаандата ылла. Уолаттарга 1 миэстэни Сангаар бастакы хамаандата ылла, 2 миэстэҕэ Куокуй, үһүскэ Кэбээйи хамаандалара таҕыстылар. Спорт аата спорт, ким бэлэмнээх, кыахтаах кыайыыга кини тиксэр. Онон бу күрэхтэһиигэ кыайыыга дьулуурун толору көрдөрбүт Куокуй орто оскуолатын волейболга тириэньэрэ Анна Павлованы көрсөн кэпсэттим.
— Кыргыттарбыттан бүгүн астынным, Сангаар, Сииттэ күүстээх хамаандаларын хотон бастаатылар, — диэн үөрүүтүн үллэстэр Анна Степановна. — Биһиги антах дьоҕус саалаҕа дьарыктанар буоллахпыт. Манна атын, киэҥ-куоҥ саала, онон бастаан ыарырҕаппыттара көстөр этэ. Онтон хомуна охсон, үчүгэйдик түмүктээтилэр. Бу иннинээҕи күрэхтэһии Кэбээйигэ буолбута, онно уолаттарым уонна кыргыттарым хамаандалара бастакы миэстэлэри ылан кэлбиттэрэ. Мин тириэньэринэн үлэлээбитим быйыл 23 сыла буолар, урукку оҕолорбун кытта улуус аатыттан өрөспүүбүлүкэ таһымыгар «Көтөр мээчиккэ» тиийэ киирсээччибит, билигин ол оҕолорум үлэһит дьон буола сылдьаллар. Биһиги 1981-1982 сс. Кэбээйигэ үөрэнэ сылдьан, Сангаарга кэлэн уолаттарга да, кыргыттарга да чемпион буолан барбыппыт. Ол саҕана волейболга оонньообут оҕолор оччотооҕу «закалкаларын» илдьэ сылдьаллар, сорохтор тириэньэрдииллэр. Урукку кэми кытта тэҥнээн көрөр эбит буоллахха, аныгы ыччаттар эт-хаан, күүс-уох өттүнэн арыычча мөлтөхтөр, үксүн компьютерга, төлөпүөҥҥэ олорор буоланнар, нүксүгүр, ачыкылаах оҕо элбээбитэ харахха быраҕыллар. Урукку оҕо аралдьыйара аҕыйах, үлэтэ элбэх, куруук хамсана сылдьара. Ол да буоллар санаабытын түһэрбэппит, эдэр көлүөнэ тахсан иһиэ буоллаҕа дии. Барыгытын кэлэн иһэр Саҥа дьылынан эҕэрдэлиибин, ситиһиилээх сыл буоллун!
Виктор Эверстов.