Аҕа дойдуну көмүскээччилэр күннэригэр, олунньу 23 күнүгэр, Кэбээйитээҕи “Сайдам” норуот айымньытын киинин тэрийиитинэн, “Айыы киһитэ аһыныгас, күн киһитэ көмүскэс” – диэн амарах санаа концера ыытылынна.
Концертан киирбит харчы – биһиги биир дойдулаахпыт, 3 оҕо тапталлаах ийэтигэр, эйэҕэс эбээтигэр Саргылана Александровна Терехова суһаллык эмтэнэ барарыгар ананна.
Үтүө быһыыга-майгыга туһуламмыт концертка кыттыыны ыллылар: нэһилиэкпит талааннаах ырыаһыттара, үҥкүүһүттэрэ, көр-күлүү маастардара. Ол курдук, З. Степанов аатынан кэрэ эйгэ “Тэлээрис” үҥкүү норуодунай ансаамбыла, 5 кылаас үөрэнээччилэрин вокальнай ансаамбыла, Анна Эверстова, эдьиийдии-балстыы — Х. Обутова, Т. Винокурова, Галина Терехова, Варвара Левина, Любовь Семенова, Прокопий Иавнов, Марина Иванова, концерт мааны ыалдьыта, биир дойдулаахпыт — Мария Охлопкова Дьокуускай куораттан кэлэн кэрэ куолаһын бэлэхтээтэ уонна Тимофей Сметанин аатынан норуодунай тыйаатыр артыыстара, “Сайдам” норуот айымньытын киинин үлэһиттэрэ, Саргылана Александровна — үлэлиир тэрилтэтин олох-дьаһах коммунальнай тэрилтэтин үлэһиттэрэ.
Нэһилиэкпит олохтоохторо ыытыллар тэрээһиҥҥэ кэлэн сэмэй кылааттарын киллэрдилэр. Ол курдук, амарах санаа концертан 34 000 солк. сууммалаах көмө харчы киирдэ.
Ефросинья Кириллина, Кэбээйитээҕи “Сайдам” норуот айымньытын киинин уус-уран салайааччыта.
Хаартыскаҕа түһэрии – Мотрена Левина