Бүгүн Арҕас сэлиэнньэтин дьоллоох туонатыгар «Угуйаан» култуура сайдыытын киинигэр нэһилиэк историятыгар киирэр үтүө күн тосхойдо.
Ол курдук, өрөспүүбүлүкэ 40 нэһилиэгэр, ол иһигэр Кэбээйи улууһугар икки нэһилиэккэ — Куокуйга уонна Чагдаҕа Саха сиригэр оҥоһуллубут «Экстра Синема» дойдутааҕы кинопрокат ситимин инновационнай биир улахан ситимэ «Угуйаан» култуура сайдыытын киинигэр туруоруллан, үөрүүлээх аһыллыыта буолла. Бүгүн бүтүн Саха сирин үрдүнэн арыллар түөрт уон «Экстра Синема» саалатын үөрүүлээх түгэннэрин Өрөспүүбүлүкэбит Ил Дархана видеоконференция нөҥүө эҕэрдэлээтэ. Ол кэннэ нэһилиэк баһылыга Лев Николаевич Павлов бу үөрүүлээх, историческай суолталаах тэрээһиҥҥэ мустубут дьону-сэргэни бэлиэ күнүнэн эҕэрдэлээтэ. Бу киинэ саалата олоххо киирэригэр «Кэбээйи улууһа» МТ аҕа баһылыгар Иван Иванович Левиҥҥа, улуустааҕы култуура салаатын салайааччытыгар Илья Николаевич Алексеевка, саҥа оборудование таҥыллан ыйанарыгар, тиэллэн кэлэригэр күүс — көмө буолбут дьоҥҥо махтал тылларын анаата.
Култуура киинин директора Надежда Валериевна Илларионова саҥа проектор, «Экстрасинема» хампаанньа туһунан кылгастык билиһиннэрдэ. Кинофикация ветерана Нина Егоровна Олесова тыл эттэ, нэһилиэккэ киноматография историятын туһунан кылгастык ахтан-санаан ааста. Ол кэннэ киинэ саалатын аалай кыһыл лиэнтэтин баһылык Лев Николаевич Павлов, «Угуйаан» Култуура сайдыытын киинин директора Надежда Валериевна Илларионова уонна СР култууратын үтүөлээх үлэһитэ, кинофикация ветерана Нина Егоровна Олесова үөрүүлээх быһыыга-майгыга быстылар.
Нина Егоровна 90-с сыллардаахха видеопленкаҕа көстөн кэлбит киинэ аныгы үйэҕэ саҥа цифровой технологияҕа көһөрөр эстафетатын туттаран, дистационнай салайыы кнопкатын баттаан, саҥа кэм экранын дохсун ытыс тыаһыгар доҕуһуоллатан түһэрдэ.
Көрөөччүлэр аан бастакынан саҥа «Угуйаан” киинэ саалатыгар «Кыталыктаах кырдалым» киинэни босхо көрдүлэр. Ыытылла турар Аҕам саастаахтар декадаларын чэрчитинэн, олохтоох дьаһалта көҕүлээһининэн, сатаан кэлэр кыахтара суох уонна ыарырҕатар аҕам саастаах дьоммутун, анал массыынанан таһаннар, аҕам саастаахтарбыт үөрүүлэрэ үксээтэ. Культура ветераннара Новикова Аксинья Дмитриевна уонна Лукина Екатерина Васильевна тэрээһиҥҥэ кэлбиттэрин, чахчы нэһилиэк историятыгар киирэр биир улахан тэрээһиҥҥэ кыттыспыттарыттан үөрүүлэрэ үгүс. Бу курдук нэһилиэк саҥа үйэни кытта бииргэ хардыылыыр, күн бүгүҥҥүттэн аныгы үйэ саҥа цифровой технологиятынан көрөөччүлэр дойдуга тахсар саҥа киинэлэри көрөн билиилэрин-көрүүлэрин хаҥатыахтара, сайдыахтара.
Бу түгэни олохтоохтор олус диэн күүппүттэрэ, саҥа тахсыбыт киинэлэри көтүппэккэ эрэ көрөр буолабыт диэн үөрүүлэрин үллэстэллэр.
Надежда Илларионова, Арҕас.