Куокуй нэһилиэгин Арҕас бөһүөлэгэр муус устар 21 күнүгэр Россияҕа Дьиэ кэргэн, Саха сиригэр Оҕо сылын чэрчитинэн нэһилиэк аҕа баһылыгын анал бирииһигэр «Чэйиҥ эрэ, хоһуун аҕалар» диэн күрэх буолан ааста. Күрэхтэһии аһыллыытын сиэрэ-туома ыытылынна. Үөрүүлээх быһыыга-майгыга нэһилиэккэ спорт тэрээһиннэрин ыытыыга үтүөлэрин иһин Россияҕа спорт хамсааһынын 100 сылынан өйдүөбүнньүк знактар Г.А. Кобяковка, А.В. Винокуровка, А.С. Павловаҕа, С.М. Гуляевка туттарылыннылар.
Күрэхтэһиигэ нэһилиэк 7 эдэр ыал аҕалара — Майкл Сергеев, Евгений Гуляев,Максим Гуляев, Иван Софронеев, Афанасий Азаров, Илья Семенов, Иннокентий Дьяконов, 7 көрүҥҥэ күөн көрүстүлэр, илин-кэлин түһүстүлэр. Күрэх олус сытыытык, интэриэһинэйдик ааста.
Ол курдук:
— Тоҥуу хаарынан сүүрүү
— Интеллектуальнай боппуруостарга эппиэттээһин
— Кууллаах хаары сүгүү, хайыһарынан сүүрүү
— Хаатыҥканы ыраахха быраҕыы
— Мэһэйдэри туорааһын
— Собону көрдөөһүн
— Сыал ытыыта.
Күрэхтэһии түмүгүнэн нэһилиэк баһылыгын анал бирииһин 30000 солкуобайы, Кубогы Илья Васильевич Семенов ылан кыайыы өрөгөйүн биллэ, иккис миэстэни Азаров Афанасий Ильич ылла, хаас наборунан наҕараадаланна, үһүс миэстэҕэ Гуляев Евгений Александрович эрэллээхтик таҕыста, спальник уонна термос хаһаайынынан буолла.
Дьяконов Иннокентий Васильевич, Сергеев Майкл , Гуляев Максим Афанасьевич, Софронеев Иван анал номинацияларга тиксэн олохтоох тэрилтэлэр туруорбут сыаналаах бириистэринэн биһирэннилэр. Үлэ, тыыл ветерана, байанайдаах булчут Гуляев Григорий Григорьевич аатынан анал бирииһи Гуляева Марина Геннадиевна дьиэ кэргэнин аатыттан Гуляев Евгений Александровичка туттарда. Тэрилтэлэр: оскуола, кулууп, библиотека, ветпункт, балыыһа, «Күннэй», «Аартык» чааһынай маҕаһыыннар, «Дьоһун саас» түмсүү , «Ача» детсад, «Ленагаз», «Сахаэнерго» бириистэри туруорбуттарын биһириэххэ эрэ сөп. Кинилэргэ махтал суруктар туттарылыннылар.
Күрэхтэһии түһүлгэтин ыалдьыттарын, кыттыылаахтарын «Луҥха долгуннара» «Саха үҥкүүтүнэн»эҕэрдэлээтилэр, сылаас алаадьынан күндүлээтилэр, ону тэҥэ, «Нарыйа» үҥкүү бөлөҕө кыттааччыларга эҕэрдэ үҥкүүнү бэлэх ууннулар.
Күрэх кэмигэр ас-үөл дьаарбаҥкатыгар нэһилиэкпит асчыт хаһаайкалара Л.Ф. Алексеева, А.Н. Гуляева, И.А. Яковлева, В.П. Иванова, Х.И. Иванова итии ас, чэй, шашлык тэрийбиттэригэр тэрийээччилэр ааттарыттан махтанабыт.
Көрөөччүлэр, ыалдьыттар күрэхтэһииттэн олус сэргэхсийэн, сынньанан тарҕастылар, тэрийээччилэргэ махтанан, маннык тэрээһиннэр инникитин утумнаахтык ыытыллалларыгар баҕа санааларын эттилэр.
Нина Олесова.