Алтынньы 29 күнүгэр Комсомол тэриллибитэ 105 сылын туолар. Бу бэлиэ күнү кѳрсѳ биhиги оскуолабытыгар тэрээhин ыытылынна.
Үѳрүүлээх линейкаҕа оскуолабыт В.Е.Колмогоров аатынан пионерскай дружинатын пионердарыгар, 1-4 кылаастар «Орлята России» тэрилтэҕэ киирбит оҕолорго дойдубут историятыгар биир сүдү миэстэни ылар ыччат сойууhун комсомол хаhан уонна хайдах тэриллибитин туhунан иитэр үлэҕэ директоры солбуйааччы М.А. Яковлева сиhилии кэпсээтэ. Сэбиэскэй былааhы туруулаhан гражданскай сэриигэ, бастакы колхозтары тэрийиигэ, Аҕа дойду Улуу сэриитин кэмигэр ѳстѳѳхтѳру кытта геройдуу охсуhуу холобура буолбут Краснодон комсомолецтарын, быйыл тѳрѳѳбүтэ 100 сылын туолбут Зоя Космедемьянская, кырыс сири туhаҕа таhаарыыга, БАМы тутууга комсомол ыччаттар күүстэрин – уохтарын ууран үлэлэспиттэрин билистибит.
Оскуолабыт директора Андрей Викторович Новгородов бу бэлиэ күнүнэн эҕэрдэтин тиэртэ уонна урукку ыччат үтүѳ холобурун салҕаан Ийэ дойдубутугар туhалаах дьон буолуубутугар ыӊырда.
Маны сэргэ тѳрѳѳбүт Сииттэбит комсомольскай ячейкатын сэкэрэтээрэ, оскуолабыт выпускнига, Сталинград куоракка сэриилэспит, Кыhыл Сулус орден кавалера Григорий Афагнасьевич Корякин туhунан география учуутала А.Л. Сивцева билиhиннэрдэ, музейга баар комсомольскай билиэттэри, комсомол устаабын, буойун учууталларбыт бары комсомол кэккэтигэр киирэн сэриигэ хорсуннук сэриилэспиттэрин, комсомольскай лидердэр, БАМ тутуутугар кыттан биир дойдулаахпыт Егор Денисович Левин мэтээлинэн наҕараадаламмытын биhиэхэ билиhиннэрбитэ сүрдээх интэриэhинэй буолла. Түмүккэ комсомол ветераннара буолбут учууталларбыт «Эн комсомол – мин дьолум» ырыанан түмүктээбиттэрэ тэрээhин суолтатын өссө күүhүрдэн биэрдэ.
Бу курдук дойдубут историятын үѳрэтиигэ, билиигэ болҕомтобутун уурабыт, элбэххэ үѳрэнэбит.
Виолетта Сергеева – В.Е. Колмогоров аатынан Сииттэ орто оскуолатын 8 кылааhын үѳрэнээччитэ