Сииттэбит нэһилиэгэр Россияҕа Дьиэ кэргэн, Саха республикатыгар Оҕо, Кэбээйибит улууһугар Култуурнай нэһилиэстибэ, Сииттэбит нэһилиэгэр Аҕа сыллара биллэриллибиттэринэн, үөрэн — көтөн, долгуйан туран улууспут дьонун — сэргэтин итиитик — истиҥник эҕэрдэлиибит. Бүгүҥҥү тэрээһин улахан сыала — соруга саҥа сылы түмсүүлээхтик көрсүү уонна ППМИ проегынан Н.Н. Попова уонна Новая уулуссаларга аныгылыы уот остуолбалара туралларыгар, нэһилиэк күүһүнэн харчы киллэриитигэр ананна. Бу кэскиллээх уонна сайдыылаах суолу өйөөбүт түөлбэлэрбитигэр , тэрилтэлэрбитигэр, олохтоохторбутугар дириҥ махталбытын тиэрдэбит. Тэрээһиммит дьиҥ сахалыы, алгыс тыл сүмэтин иҥэрэн, сырдык санаа, ыраас дууһа маанытын, бар дьонун саҥа сылынан арчылаата, алҕаата нэһилиэкпит үөрэхтээх алгысчыта Роман Попов.
Олохтоох дьаһалта баһылыга Семен Тимофеевич саҥа сыл түстэммитинэн, бар дьонун ис сүрэҕиттэн эҕэрдэлээтэ уонна 2024 сылга ыытыллар улахан үлэлэр торумнарын бар дьонугар билиһиннэрдэ, көхтөөх кыттыыны субботниктарга, бары ыытыллар хамсааһыннарга биир киһи курдук кытталларыгар ыҥырда.
Дьиэ кэргэн сылыгар аналлаах улахан быыстапка тэрилиннэ, бу быыстапкаҕа саҥа сонун оҥоһуктар турдулар. Махталбытын тиэрдэбит тарбахтарыгар талааннаах нэһилиэкпит далбар хотуттарыгар Яна Оконешниковаҕа, Александра Степановаҕа, Анастасия Петроваҕа уонна Мария Тимофееваҕа. Олохтоох библиотека сэбиэдиссэйэ Мария Обутова Дьиэ кэргэн сылыгар аналлаах бэртээхэй кинигэ быыстапкатын тэрийдэ. Бырааһынньыктааҕы сэмэй тэрээһиммитин киэргэппит Сииттэбит орто оскуолатын коллективыгар (директор Андрей Новгородов), «Чуораанчык» детсад коллетива (сэб. Ольга Александроваҕа), олохтоох балыыһа коллективыгар (сэб. Алина Павловаҕа), «Иэйии» эдэр ийэлэр кулууптарыгар (сал. Марианна Захароваҕа), бырааһынньыктааҕы концерпытын тэрийистэ Мария Расулова, байаан алыптаах тыаһын бар дьонугар бэлэх ууммут Варвара Левинаҕа уонна бары бары кыттааччыларбытыгар өссө төгүл барҕа махталбытын тэрийээччилэр ааттарыттан тиэрдэбит.
Үҥкүү диэн көрөөччү интэриэһин ханнык баҕар тэрээһиҥҥэ күүскэ тардарын, бырааһынньыгы киэргэтэрин бары бэрткэ билэбит, ол курдук, нэһилиэкпитигэр бары үҥкүүнү туруоран, көрөөччү биһирэбилин өрүү ылар, Сииттэ орто оскуолатын алын сүһүөх кылаас учуутала Сардана Гуляеваны ааттыахпын баҕарабын, ис сүрэҕиттэн көмөтүн иһиҥ дириҥ махталбытын тиэрдэбит. Бүгүҥҥү бырааһынньыкпытыгар барыта 20000 тыһ. харчы киирдэ, онон өрүү күүс — көмө буолар, ис сүрэхтэриттэн төрөөбүт төрүт дойдубут силигилии сайдарыгар кыһаллар, ыалдьар, бар дьоммутунан буоларын курдук киэн туттабыт. Долгутуулаах тэрээһиммитигэр оҕолордуун, кыттааччылардыын 74 киһи сырытта, ППМИ-га сүҥкэн кылааттарын киллэрдилэр. Барыгытыгар этэҥҥэ буолууну баҕарабыт, инникитин былааннар өссө да улахаттарын бэлиэтиибит, бу ыарахан кэмнэргэ биир сомоҕо буоллахпытына барытын кыайыахпыт, тобулуохпут диэн эрэнэбит.
Марианна Сивцева.