Сахабыт килбэйэр киин куоратыгар «Муус устар-2025» эдэр ыччат үбүлүөйнэй бэстибээлин иһинэн «Доброволец Якутии» үһүс өрөспүүбүлүкэтээҕи бириэмийэтин финалистарын түмүү буолан ааста.
Бэлиэтиир буоллахха, бу күрэх үһүс төгүлүн Сахабыт сирин волонтерскай түмсүүлэрин, биирдиилээн доброволецтарын ыккардыгар уһулуччу таһымнаах үлэлээхтэри бэлиэтиир, көҕүлүүр, махтанар сыаллаах-соруктаах тэриллэн ыытыллар.
Быйылгы күрэххэ 14 анал аакка 200-тэн тахса сайаапка киирбититтэн 42 бастыҥ үлэлээх түмсүүлэри, биирдиилээн волонтердары сиидэлээн ыланнар наҕараада туттардылар. Онтон бу 42 наҕараадаламмыттан 14 бастыҥтан-бастыҥнар ааттаннылар.
Биһиги улуустан бу күрэххэ Кэбээйи нэhилиэгин «Үтүө түгэн» уопсастыбанай түмсүү (салайааччы Т.Д. Максимова) иккис сылын «Лучший волонтерский штаб» номинацияҕа киирсэн финалист буолла. Онтон «Надежный тыл» иис сыаҕын салайааччыта Кландра Терехова «Лучший патриотический проект» номинацияҕа киирэн кыайыылаах аатын сүгэн тэрил ылынарга анаан харчынан бириэмийэлэннэ.
Финалга киирбиттэргэ сертификаттар, анал бэлэхтэр туттарылыннылар.
Татьяна Максимова-Лазарева