Быйылгы 2024-25 саҥа үөрэх сылыгар Кэбээйи орто оскуолатын боруогун 344 оҕо атыллаатылар, ол иһигэр — 24 бастакы кылаас үөрэнээччилэрэ.
Оскуола агрохайысхалаах буолан сайыҥҥы кэмҥэ оҕолор Экология сиригэр уонна Пришкольнай учаастакка лааҕырдарга үлэлээтилэр, сынньаннылар.
Оҕолору үөрэтиэхтэрэ-такайыахтара 49 учуутал, 9 эбии үөрэхтээһин педагогтара. Ханна да буоларын курдук кэлин учууталлар сынньалаҥҥа бараннар, солбуйарга саҥа кадрдарга вакансия биллэриллэр. Ол курдук, быйыл нуучча тылын учууталынан Мария Николаевна Борисова, педагог-организаторынан Камилла Кирилловна Шарина кэллилэр. Билигин да 1 ставка математика учууталыгар вакансия аһаҕас турар.
П.Д. Степанов аатынан кыраайы үөрэтэр музей оскуола коллективын кытары ыкса үлэлиир, араас формалаах тэрээһиннэр, уроктар, экскурсиялар, выставкалар ыытыллаллар. Быйылгы үөрэх сылыгар оскуола өттүттэн эппиэттээх — оскуола музейын салайааччыта, саха тылын учуутала Марина Ивановна Егорова. Марина Ивановна экскурсовод Айта Анатольевналыын үлэлэрин былааннаан бу сайын «Ытык дьоммут суолларынан» диэн экспедиция тэрийдилэр. Кыһыҥҥы өттүгэр араас формаларынан үлэлииргэ былааннаннылар.
П.Д. Степанов аатынан кыраайы үөрэтэр музей директора Григорий Егоров.