Тохсунньу 17 күнүгэр Кэбээйитээҕи П.Д. Степанов аатынан кыраайы үөрэтэр түмэлгэ СӨ култууратын үтүөлээх үлэһитэ, бочуоттаах бэтэрээн, Кэбээйи улууһун уонна нэһилиэгин бочуоттаах олохтооҕо, успуорт бэтэрээнэ Егор Авксентьевич Павлов «Кэбээйигэ успуорт сайдыытыгар үтүөлээх дьоннорбут» диэн СӨ физкультурнай хамсааһынын 100 сылыгар анаан — Кэбээйи бөһүөлэгиттэн төрүттээх спортсменнары сырдатан, успуортка сыһыаннаах оскуола оҕолоругар аналлаах бэрт сэргэх тэрээһин буолан ааста.
Бу тэрээһиҥҥэ успуорт бэтэрээннэрэ, Кэбээйи нэһилиэгин оҕо успуордун оскуолатын үлэһиттэрэ кыттыыны ыллыллар. Оҕолорго успуорт хаһааҥҥыттан, хайдах саҕаланан барбытын, кэбээйилэр 100 сыл тухары бу эйгэҕэ туох ситиһиилээхтэрин, кимнээх баалларын сиһилии кэпсээтилэр.
Кэлбит ыалдьыттарга Егор Авксентьевич бэйэтэ таҥан таһаарбыт «Спорт – олох биир тутула» диэн ааттаах кинигэтин бэлэх уунна. Кэбээйи нэһилиэгин оҕо успуордун оскуолатын дириэктэрин солбуйааччыта Алексей Нимаевич Сыроватскай Улуустааҕы успуорт управлениятын начальнигын Игнат Викторович Березкин аатыттан махтал суруктары успуорт бэтэрээннэригэр Павлов Егор Авксентьевичка, Петров Николай Андреевичка, Обутов Павел Егоровичка, Сметанин Василий Алексеевичка, ытык кырдьаҕаска Попов Руслан Герасимовичка туттарда.
Ол курдук, Егор Авксентьевич оҕолорго баҕа санаатын эттэ:
«Биһиги эмиэ атын улуустар, нэһилиэктэр курдук спортивнай олоххо историялаах буолуохтаахпыт. Ол историябыт бэрээдэктэниэхтээх. Ким ханна хаһан тугу гыммыта учуоттаныахтаах, суруллуохтаах. Кэлэр көлүөнэҕэ барыта хаалыахтаах. Онон бүгүн, эдэр дьоҥҥо биһиги успуорт бэтэрээннэрэ баҕа санаабыт диэн — успуорду кытары доҕордоһуҥ! Билигин эдэр сааскытыгар эрэ дьарыктанан баран тохтоон хаалымаҥ. Холобура мин 79 саастаах киһи сарсыарда аайы биэстии килэмиэтирэ хааман кэлэбин. Успуорт тэрээһинин өйүүбүн. Миигин кытта тэҥҥэ алтыһар доҕорум-атаһым Руслан Герасимович диэн оскуола учуутала, ытык кырдьаҕас, 80-тан тахсыбыт киһи, күн бүгүнүгэр диэри чөл олоҕунан олорор, күн аайы хааман билигин даҕаны дьарыктана сылдьар.
Эһиги, эдэр дьон, аҕа дьоҥҥутун кэтээн көрөн үөрэниҥ. Үчүгэй өрүттэрин куруук холобур туттар буолуҥ!»
Иван Софронов
Хаартыскаҕа түһэрии: Наталья Сметанина, Анастасия Мартынова, Айталина Максимова.