Кулун тутар 12 күнүгэр Кэбээйи нэһилиэгэр «Сылгыһыт күнэ-2025» тэрээһин өрө көтөҕүллүүлээхтик ыытылынна. Ол курдук, аатырбыт Малыыда эбэ киэҥ туонатыгар улуус сылгыһыттарын күрэҕин, ат сүүрдүүтүн көрөөрү дьон-сэргэ өрө көтөҕүллэн тоҕуоруһа түмүстэ.
Күрэххэ Чагда, I Лүүчүн, Кэбээйи сылгыһыттара күөн көрүстүлэр. «Сылгыһыт күнэ-2025» тэрээһини Кэбээйи улууһун дьаһалтата (Сивцев А. С.), улуустааҕы култуура управленията (Алексеев И.А.),улуус тыа хаһаайыстыбатын управленията (Селляхов Г. Г.), улуус спордун управленията (Мордовской А.Ф.),оҕо уонна ыччат спортивнай оскуолата (Сметанина Н.Н.), Кэбээйитээҕи култуура сайдыытын киинэ (Семенова Л. С.) тэрийэн ыыттылар.
Күрэхтэһии кыттааччылар сахалыы сиэдэрэйдик симэммит Дьөһөгөй оҕолорун сиэтэн киллэрэн сэлэлии хаамыыларыттан саҕаланна. Бу кэннэ тэрээһин саамай тыҥааһыннаах түгэнэ сылгыһыттар күрэхтэрэ буолла. Манна кыттааччылар 100 миэтэрэни булчут хайыһарын кэтэн сүүрдүлэр, 50 миэтэрэни аттарын толору ыҥыырын сүкпүтүнэн сүүрдүлэр, сымсатык кутаа уоту оттон итии чэйи оргута оҕустулар. Аттарын ыҥыырын кэтэрдээт 1000 миэтэрэҕэ түһүннүлэр.
Манна кыайыылаах үрдук аатын Чагда нэһилиэгиттэн Назир Карасартов ылыаҕын ылла уонна Кэбээйи улууһун дьаһалтата туруорбут 50000 тыһыынчалаах сертификатынан наҕараадаланна. Иккис миэстэҕэ I Лүүчүнтэн Степан Каримов тахсан штиль мас эрбииринэн биһирэннэ. Үһүс бочуоттаах миэстэни Кэбээйиттэн Николай Кобяков ылла. Ону таһынан, Кэбээйи улууһун бааһынай хаһаайыстыбалара кыттыһан туруорбут анал бириистэригэр киирсиигэ Назир Карасартов тэҥнээҕин булбата уонна 12000 солк наҕараадаланна.
Дьэ, бу кэннэ дьон-сэргэ долгуйа күүппүт, ыһыылаах-хаһыылаах 5000 миэтэрэҕэ аттар илин-кэлин түсүһүүлэрэ буолла. Манна Кэбээйиттэн Валерий Кривошапкин ата биэтэккэ бастакыннан кэлэн тэҥнээҕин булбата. Иккис миэстэҕэ Степан Каримов, үһүс миэстэҕэ Назир Карасартов тигистилэр. Ат сүүрдүүтүгэр биир кэрэхсэбиллэҕинэн Чагда уонна I Лүүчүн нэһилиэктэрин Аҕа баһылыктара Айыл Седельников уонна Софрон Григорьев кэлэн кыттыыны ыллылар, бэйэлэрин холонон көрдүлэр.
«Ворошилов» бааһынай хаһаайыстыба (cал. Левина А. В.) нэһилиэк олохтоохторун, кэлбит ыалдьыттары бука барыларын итии ис миининэн, үүттээх чэйинэн, ас эгэлгэтинэн күндүлээтэ.
Дьон-сэргэ сааскы сылаас күҥҥэ сибиэһэй салгыҥҥа дуоһуйа сынньанан, сэргэх күрэхтэһиини көрөн сүргэлэрэ көтөҕүллэн тарҕастылар.
Светлана Оконешникова