Дьэ, кырдьык дьикти түгэн Кэбээйигэ бүгүҥҥү Ороһооспо күн буолла. Тохсунньу ый тоһуттар тымныытыгар иһийэн турар тыаҕа оҕолор чаҕаар куоластара иһилиннэ.
Бу элбэх оҕолоох Петр уонна Анастасия Тереховтар кырачаан көмүстэригэр Ороһооспо аптаах күнүгэр оҕо саас умнуллубат дьикти түгэннэриттэн саамай, саамайдарын бэлэх ууннулар.
Кыһыҥҥы тыаҕа уоттаах күөстээх харыйаларын салаасканан хоҥурахха соһон илдьэ тахсаннар, оҕолорго маскарадтарын кэтэрдэннэр үөрүү-көтүү өрөгөйүн көрсөн дьоллонон киирдилэр.
Маннык түгэн тыйыс тымныы айылҕалаах Саха сиригэр, халыҥ хаары бүрүнэн турар тыа ортотугар бука дэҥҥэ хатыланара чахчы.
Оҕолор харахтара уоттана — уоттана, дьол кыымынан ыһыахтанан уобараска киирэннэр видеоҕа уһуллан, хаартыскаҕа түһэн дьиҥнээх остуоруйа ойууругар сылдьан имнэрэ тэтэрэн дуоһуйан кэллилэр.
Татьяна Максимова-Лазарева