Кэбээйи нэһилиэгэр Ил Түмэн оробуочай састааба кэлэн үлэлии сылдьар.
Ол курдук, тохсунньу 18 күнүгэр Александр Николаевич Жирков — СӨ Ил түмэн бэрэссэбээтэлин бастакы солбуйааччыта, СӨ Ил Түмэн бэрэссэдээтэлин солбуйааччыта – бүддьүөккэ, үпкэ, түһээн уонна сыана бэлиитикэтигэр, Николаев Юрий Михайлович — Бас билии уонна приватизация боппуруостарыгар сис кэмитиэт бэрэссэбээтэлэ, Голомарева Елена Христофоровна — СӨ бар дьонун дьокутаата, Хоту дойду төрүт олохтоох аҕыйах ахсааннаах норуоттарын боппурустарыгар уонна Арктика дьыалаларыгар сис кэмитиэт бэрэссэдээтэлэ, Находкин Андрей Михайлович — Айылҕа баайыгар уонна экологияҕа сис кэмитиэт бэрэссэдээтэлэ, Прокопьев Владимир Михайлович — Олохтоох салайыныыга сис кэмитиэт бэрэссэдээтэлэ, Сусоев Александр Владимирович — СӨ бар дьонун дьокутаата, ону тэҥэ правительство бэрэстэбиилэллэрэ: Афанасьев Николай Степанович – СӨ Тыа хаһаайыстыбатын уонна үп бэлиитикэтин миниистирин солбуйааччыта, Бурнашева Любовь Степановна – СӨ Доруобуйа харыстабылын миниистирин солбуйааччыта, Коркин Семен Николаевич – СӨ Транспорт уонна суол хаһаайыстыбатын миниистирин солбуйааччыта, Дьяконов Владимир Афанасьевич – СӨ Промышленность департаменын салайааччытын солбуйааччыта, Макаров Егор Иванович – СӨ Федеральнай бырагырааммалары кытта уонна судаарыстыбыннай хаппытаалынай ууруулары кытта үлэлэһэр департамент салайааччытын солбуйааччыта, Эверстова Светлана Васильевна – СӨ култуура уонна өй-санаа сайдыытын министиэристибэтин тутаах исписсэлииһэ кэллилэр. Ону тэҥэ Левин Иван Иванович – Кэбээйи улууһун баһылыга, улуус баһылыгын бастакы солбуйааччыта – Александр Сидорович Сивцев, улуус сэбиэтин депутаттарын мунньаҕын бэрэссэдээтэлэ – Савва Июльевич Афанасьев састааптаах олохтоохтору кытта «Сайдам» норуот айымньытын киинигэр сүбэ мунньах буолан ааста.
Бу сүбэ мунньахха култуура киинигэр дьон-сэргэ бөҕө мустубут. Тэрээһиҥҥэ ытык кырдьаҕаһыттан саҕалаан, оскуола оҕолоругар тиийэ элбэх киһи мустан, бэйэлэрин санааларын атастастылар. Тойоттор олохтоохтору кытары сирэй көрсөн, онно тутатына туруоруллубут боппуруостарга өйдөнөр гына, чуолкайдык хоруйдаатылар.
Мунньаҕы Кэбээйи улууһун баһылыга Иван Иванович Левин салайан ыытта. Олохтоохтор тыа хаһаайыстыбатын сытыы боппуруостарын таарыйан аастылар. Ветстанцияны Кэбээйигэ көһөрүү, оттуу барар сирдэргэ муосталары тутуу, от тиэйиитигэр бензин, сэлээркэ ыараханын, субсидия көрүллүбэтин, балыыһаҕа койка миэстэтин элбэтии, ыарыһахтар сайын да, кыһын да Сангаарга көрдөрүнэ барар кыахтара суоҕун, авиапорт оҥоһулларын туһунан боппуруостары көтөхтүлэр. Кэбээйигэ инникитин Олоҥхо ыһыаҕын оҥорорго уо.д.а. баҕа санааларын эттилэр.
СӨ Ил Түмэн судаарыстыбыннай мунньаҕын грамотатынан Левина Аксинья Васильевна, Егорова Александра Алексеевна, Терехова Кландра Андреевна, Максимова Парасковья Михайловна, Павлов Егор Авксентьевич, Петрова Мария Никитична, Лепчикова Татьяна Петровна, Евлева Агафия Денисовна, Эверстова Аграфена Васильевна, уо.д.а. наҕараадаланнылар.
Итини сэргэ, СӨ бар дьонун дьокутаата Александр Сусоев бэйэтин аатыттан Андрей Егорович Левиҥҥа, Николай Иннокентьевич Ивановка, Николай Андреевич Лугиновка, Гаврил Павлович Харлампьевка, Наталья Николаевна Сметанинаҕа, Эдгар Александрович Кулачиковка, Аграфена Степановна Афанасьеваҕа, Татьяна Петровна Лепчиковаҕа «Кэбээйи улууһун, Кэбээйи нэһилиэгин сайдыытыгар сүрүн кылааты уурбуттарын иһин» махтал суруктары туттарда уонна «Кэбээйилэр бары эйэлээх буолуохха, бары бииргэ үлэлиэххэ-хамныахха» диэн баҕа санаатын эттэ.
Түмүккэ СӨ Ил түмэн бэрэссэбээтэлин бастакы солбуйааччыта Жирков Александр Николаевич Жирков салайааччыларга уонна олохтоохторго ситиһиилээх үлэни-хамнаһы, дьон-аймах олоҕо тупсарыгар дьаныары баҕарда.
Иван Софронов
Ааптар хаартыскаҕа түһэриилэрэ