Сииттэ нэһилиэгэр сааскы ылааҥҥы күннэри үөрэ — көтө көрсөн, «Иис — күүс абылаҥар куустаран.. » диэн ааттаах Олоҥхо ыьыаҕар бэлэмнэнэн, ону кытта быйылгы Кыайыы ыһыаҕын үрдүк таһымҥа көрсөр инниттэн, олбохтору, кыбытыктары, паннолары, аппликациялары тигэргэ олус бэртээхэй маастар- кылааһы салайан ыытта, биир дойдулаахпыт, нэьһлиэкпит убаастанар кийиитэ, сатабыллаах хаһаайка, истиҥ ийэ, эйэҕэс эбээ Ольга Ивановна Тимофеева. Кини кыра уола анал байыаннай дьайыы саҕаланыаҕыттан дойдутун чиэһин үтүө суобастаахтык көмүскүү сылдьар. Ольга Ивановна хаһан да дьарыга суох олорбот, өрүү сонунтан сонун иистэри айа — тута сылдьар биир бастыҥ хаһаайканнан билинэбит. Бэйэтэ да тугу эмит дьарыктаннахпына эрэ бириэмэни билбэккэ аһарабын диэн санаатын тириэрдэр. Эдэр хаһаайкаларга өрүү баҕа санаатын аһаҕастык тириэрдэр. Билиҥҥи үйэҕэ, хас биирдии хаһаайка барытын сатыахтаах диэн сүбэлиир. Ыытыллыбыт тэрээһиҥҥэ иистэниэн баҕалаах уонтан тахса кэрэ аҥар көхтөөх кыттыыны ыллылар. Ольга Ивановна олус тиийимтиэтик, борустуойдук быһаарда, быһан уонна тигэн көрдөрбүтүн, баҕалаахтар туспутугар туһаныахпыт диэн видеоҕа устан ыллылар. Бүгүҥҥү тэрээһиммит туһата улахан буолла. Ольга Ивановна өҥнөрүнэн аттаран, ханнык олбохтору, паннолары тигиэххэ сөптөөҕүн барытын быһааран биэрдэ. Иккилии паара буолан паннолары үллэстэн тарҕастылар. Онон хамсааһын баран эрэриттэн үөрдүбүт. Ыйга иккитэ көрсөн үлэлэрбитин ырытыһыах буолан араҕыстыбыт. Түгэнинэн туһанан анал байыаннай дьайыыга сылдьар оҕолордоох кэрэ аҥардарбытыгар, култуура улэһиттэрэ, махтанан туран сэмэй бэлэхпитин туттардыбыт. Улахан махталбытын тиэрдэбит, нэһилиэкпит көхтөөх кэрэ аҥардарыгар, ону кытта ыҥырыыбытын ылынан, сүбэ — ама буолбут Ольга Ивановна Тимофееваҕа. Дьоллоох, доруобай буолун күндү дьоммут.
Марианна Сивцева
