2023-2024 сылларга СӨ Ил Дархана Айсен Сергеевич Николаев грант олохтоон, “Хомусный код” диэн ааттаах бырайыак үлэтэ ыытыллыбыта. Бу бырайыак СӨ оскуолатын үөрэнээччилэригэр култуурунай үөрэх эйгэтин сайыннарар сыаллаах тэриллибитэ уонна Аан дойду норуоттарын музейа, Хомус киинэ көҕүлэһэн үлэни сүрүннүүллэр.
Быйылгы сылга “Хомус эйгэтэ” бырайыак республикаҕа бары үөрэх тэрилтэлэрин хабан хас да түһүмэҕинэн үлэни ыытар. Аан дойдутааҕы хомус түмэлин уһуйааччылара СӨ 1600 тахса үөрэнээччилэригэр талааннарын сайыннаралларыгар, хомус дорҕоонугар угуттанан дуоһуйууну ылалларыгар көмөлөһөллөр.
Ол курдук, кулун тутар 5 күнүгэр Кэбээйитээҕи Егор Егорович Эверстов аатынан орто оскуолаҕа Хомус Аан дойдутааҕы киинин уонна түмэлин үлэһиттэрэ, хомус эйгэтин уһуйааччылара – Туяра Анатольевна Жиркова, Алена Гавриловна Платонова кэлэн көрсүһүү оҥордулар.
Бу көрсүһүүгэ Аан дойдутааҕы Хомус түмэлин төрүттээччи, тыл билимин доктора, Аан дойдутааҕы Хомус түмэлин бэрэсидьиэнэ Иван Егорович Алексеев – Хомус Уйбаан Кэбээйи нэһилиэгин олохтоохторугар эҕэрдэтин күөх экран нөҥүө тиэртэ. Бу бырайыак сүрүн үөрүүлээх түгэнинэн байыаннай дьайыы кыттыылаахтарын оҕолоругар хомус туттарыыта буолла. Хомуһу — 20 оҕоҕо анаан, Уус Алдан улууһун тимир ууһа – Александр Александрович Шепелев оҥорбут.
Салгыы бырайыак кыттыылаахтара кылаастарынан арааран, хомус дьикти дорҕоонугар үөрэтэ тарҕастылар.
«Сайдам» норуот айымньытын киинэ