Сииттэ нэһилиэгэр аныгы сайдыы тэтимин тутуһан, ыал аайы күөх төлөнү уматыы эбиллэн иһэриттэн киһи сүргэтэ көтөҕүллэр. Ол аата дойдубутугар сайдыы барар, олоҕу кытта тэҥҥэ устар эбиппит диэн ис сүрэхтэн олуһун үөрэбит. Олохтоох дьаһалта бары ирдэнэр дөкүмүөннэрэ түргэнник ситэригэр, улуус салалтатын кытта бириэмэтигэр сөптөөхтүк үлэлэһэн быйыл икки ыалга социальнай гаазтааһыны килэрдилэр.
Элбэх оҕолоох Григорий Карамзиннарга, ону тэҥэ инбэлиит дьиэ кэргэттэргэ Люция, Николай Томскайдарга стояктары туруордулар. Саҥа дьиэни сандаардыбыт Прасковья Ноговицынаҕа, Елена, Афанасий Новгородовтарга газ ситимэ толору киирдэ. Новгородовтар дьиэ кэргэттэрэ, соҕотох тирэх буолар уоллара, былырыын күһүн мобилизацияҕа түбэһэн, быстах эпирээсийэҕэ Украинаҕа барбыта номнуо сылтан орто. Дима аҕата үһүс группалаах инбэлиит, ийэтэ пенсияҕа олорор. Үөһэ ахтан ааспытым курдук, бу үлэни барытын учуоттаан олохтоох дьаһалта баһылыга Семен Тимофеев улуус дьаһалтатын кытта ситимнээхтик үлэлэспит түмүгэ буолар. Новгородовтар дьиэлэрин паспорын саҥалыы оҥотторон, дьиэлэригэр күөх төлөн киирэн, нус — хас олохтоноллорун туһугар күүс — көмө, өйөбүл буолланнар, дьиэлээхтэр махталлара улахан. Газ киирэр үлэни, үлэһиттэр үтүө суобастаахтык толороллоругар, бириэмэтигэр хонтуруоллаһан, дьиэлээхтэри кытта тэбис тэҥҥэ түбүгүрдэ, олохтоох дьаһалта баһылыгын солбуйааччыта Петр Степанов. Бу үлэни иилээн — саҕалаан тиһэҕэр тириэртилэр ХЭТ «Теплый дом» үлэһиттэрэ, (генеральнай директор А.А. Кычкин). Газ толору холбоммут үөрүүлээх күнүгэр Прасковья Ноговицына, Елена, Афанасий Новгородовтар ис сүрэхтэн газ оператордарыгар Николай Соловьевка, Анатолий Ивановка махтал тыл бастыҥын анаатылар. Бииртэн биир, киһи сүргэтин көтөҕөр, истиҥ тыллаах махтал тыллара, нэһилиэкпит ватсап группатыгар субулуннулар , ол курдук бастатан туран олохтоох баһылыкпытыгар Семен Тимофеевка, баһылык солбуйааччытыгар Петр Степановка үтүө тыл үтүмэнэ, алгыс тыл мааныта ананнылар.
Ити курдук тапталлаах Сииттэбит сиэдэрэй сирэ — уота, саҥа дьиэлэринэн өссө даҕаны бөһүөлэкпитин киэргэтэн иһэригэр, ыччат оҕолорбут дойдуларыттан тэйбэккэ, тохтоон, олохсуйан, дойдулара сайдарын туһугар турууластыннар, дьулустуннар диэн кэс тылбытын анаатахпыт буолуохтун.
Марианна Сивцева.