Бүгүн биһиги кэриэстиибит сэрии толоонугар охтубуттары, эйэлээх олох иһин саа саадах тутан сэриилэспит биир дойдулаахтарбытын.
Олохтоох библиотекаҕа «Өйдүүбүт, махтанабыт, сүгүрүйэбит» диэн библиотечнай уруок буолла. Сэриигэ баран өлбүт, сүппүт, этэҥҥэ эргиллэн кэлбит буойуннар сырдык кэриэстэригэр ахтыы, слайд, хоһоон ааҕылынна. Оҕолор биир дойдулаахтарын туһунан ахтыыны сэргээн иһиттилэр.
Ону тэҥэ анал байыаннай эппэрээссийэҕэ сылдьар уолаттарбыт төрөппүттэрин кытта көрүстүлэр, истиҥ кэпсэтии ыытылынна. Роман Игнатьевич Попов (төрөппүт) үөрэнээччилэргэ туһаайан истиҥ тылын тиэртэ. Үөрэнээччилэр болҕойон олорон иһиттилэр. Библиотекарь Мария Степановна төрөппүттэртэн уолаттарын оскуолаҕа үөрэнэр сылларын туһунан кылгас интервью ылла.
Кыайыы күнүн көрсө ыытыллар тэрээһиммитигэр өрүү көхтөөх кыттааччыларбытыгар (6 уонна 8 кылаас үөрэнээччилэригэр), кылаас салайааччыларыгар А.Г. Сидороваҕа, Р.А. Винокуроваҕа махталбытын тиэрдэбит уонна үөрэхтэригэр, үлэлэригэр ситиһиилэри баҕарабыт.
Сииттэбит нэһилиэгиттэн анал байыаннай эппэрээссийэҕэ 7 уол сылдьар. Уолаттарбыт төрөппүттэригэр сэрии этэҥҥэ түмүктэнэн, буойуттарбыт кыайыы кынаттаах этэҥҥэ дьиэлэригэр эргиллэн кэлэллэригэр баҕа санаабытын тиэртибит, сэмэй бэлэхпитин туттардыбыт уонна өйдөбүнньүк хаартыскаҕа түстүбүт.
Мария Обутова, Сииттэ нэһ.