Кэбээйитээҕи кыраайы үөрэтэр түмэл дьиэтин Олоҥхо хоһугар биир дойдулаахпыт Арассыыйа суруйааччыларын союһун чилиэнэ, поэт, прозаик, драматург Иннокентий Наумович Левин – Ньээчэс “Эһиэхэ аныыбын күн уотун…” кинигэтин сүрэхтэниитэ буолла. Үөрүүлээх түгэҥҥэ Иннокентий Наумович чугас дьоно, үөлээннээхтэрэ, доҕотторо, табаарыстара кэлэн иһирэх тылларынан ахтан-санаан аастылар.
Көрсүһүүнү киирии тылынан түмэл сүрүн харайааччыта, поэт, «Кулуһут кут», «Лена долгуннара» литературнай түмсүүлэр салайааччылара, Арассыыйа суруйааччыларын союһун чилиэнэ Иосиф Григорьевич Кобяков саҕалаата. Нэһилиэкпит аҕа баһылыга Илья Иванович Левин этиитигэр Кэбээйибит сирин айар куттаах дьоннорун кинигэлэрэ тахсалларыгар кыах баарынан көмөлөһөллөрүн туһунан эттэ. Тэрээһин саҕаланыыта Саргылана Семеновна салайааччылаах II кылаас үөрэнээччилэрэ ис киирбэхтик, астынан туран Иннокентий Наумович «Таабырын хоһооннорун» аахтылар. Поэт оҕолорго анаан элбэх хоһоону суруйан хаалларбыта.
Поэт хоһоонноро оҕо ааҕарыгар судургу, өйдөнүмтүө буоларын Кэбээйи оскуолатын саха тылын учуутала Марина Ивановна Егорова бэлиэтээтэ. Бу истиҥ тэрээһини Кэбээйитээҕи модельнай библиотека үлэһиттэрэ Анна Павловна, Саргылана Прокопьевна, Светлана Васильевна иилээн-саҕалаан ыыттылар. Кинилэр Ньээчэс олоҕун, айар үлэтин, Левиннар айылҕаттан айдарыылаах, тарбахтарыгар талааннаах халыҥ аймахтар тустарынан киэҥ ис хоһооннох слайд-презентацияны оҥорон көрдөрдүлэр, поэт хоһооннорун ырытан дьоҥҥо кэпсээтилэр. «Күбэйэ» кулууп эбээлэр түмсүүлэрэ Ньээчэс тылыгар, биир дойдулаахпыт Алексей Калининскай – Луҥха Өлөксөй мелодиятыгар норуот сөбүлүүр «Эдэр сааспын миэхэ хааллар» диэн ырыатын иэйэн-куойан туран ыллаатылар. Кинигэ үөрүүлээх сүрэхтэниитин туһунан Иосиф Кобяков ВГТРК устар бөлөҕөр интервью биэрдэ.
Тэрээһин түмүгэр Иннокентий Наумович бэйэтэ саҥара турар видеоролигын долгуйа көрдүбүт. Мустубут дьон бэлиэ түгэни уопсай хаартыскаҕа түһүүнэн түмүктээтибит.
Айталина Максимова, түмэл үлэһитэ.