Дьиэ кэргэн саҥа дьыллааҕы ураты үгэстэрэ

Оҕо сааска саамай күүтүүлээх, дьиктилээх саҥа дьыллааҕы бырааһынньыктар аастылар.

Урукку сылларга оҕо сылдьан эргэ саҥа дьыл бүттэ да 11 ый устата диэн бириэмэлээн­ харыйабыт оонньуурдарын хаһыакка суулаан сундуук түгэҕэр угарбыт.
Ол урут. Онтон билигин эҥинэ бэйэлээх дьэрэкээн оонньуурдары талан, өссө араас истииллээн киэргэтии кэмэ. Ол эрээри билигин да сундуук түгэҕин хаһан харыйаны симиир ураты көрүүлээх ыаллар бааллар эбит диэн сөҕө-махтайа турабын.
Ол курдук, бииргэ үлэлиир дьүөгэм Эверстова Анастасия Васильевна сыл ахсын ураты дьикти кэрэ харыйа оонньуурдарын муспута номнуо 20-тэн тахса буолбут. Киһи хараҕа үөрэр эриэккэс таас оонньуурдары көрөн дьиктилээх алыптаах оҕо сааскын саныыгын.
Аны туран эдэр ыаллар Александр уонна Анна Кобяковтар харыйаны эмиэ уратытык симииллэр эбит. Бу эмиэ ураты көрүү уонна көстүү. Анна Егоровна оҕолорун кытта фетрынан, фоамиранынан оҥорбут араас остуоруйа кыыллара харыйаттан чахчы субу түһэн хааман кэлиэх курдуктар.
Өссө баар эбит музыкальнай харыйа – фоамиранынан оҥоһуллубут көмүс мөһүүрэ хомустар, ноталар, скрипичнай күлүүстэр уокка кылабачыһан киһи дууһатын аптаах музыка дорҕоонунан толороллор.
Дьиэ кэргэн бу курдук араас үгэскэ кубулуйбут дьарыктааҕа олус кэрэхсэбиллээх, хайҕаллаах диэммин сөҕөн тураммын сурукка тистим, үөрүүбүн үллэһинним.

Ирина Кобякова.