Быйылгы Дьиэ кэргэн күнэ Тыайаҕа Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларынан биллэриллибитин чэрчитинэн, Н.Х. Дьяконов аатынан Тыайа орто оскуолатын үлэһиттэрэ өрүү да буоларыныы, сүҥкэн үлэни тэрийэн ыыттылар. Ол курдук, оскуолаҕа «Дьиэ кэргэн дьоло — оҕоҕо» декаданы түмүктээн, төрөппүттэргэ аһаҕас аан түһүлгэтэ бэрт сэргэхтик ыытылынна.
Бу тэрээһиннэр анал темаларынан аттарылыннылар: бастакы кылааска М.Г. Полятинская «Дьиэ кэргэн – бигэ тирэх” кылаас чааһа, иккис кылааска Кондакова М.П. төрөппүттэринээн Анна Алексеевна Ивановалыын уонна Дьяконова Мария Платоновна Дьяконовалыын таптыыр дьарыктарыгар маастар-кылаас, үһүс кылааска Охлопкова Ю.С. дьиэ кэргэн дьарыга, үгэһэ, дьоро күннэригэр аналлаах дьарык, бэһис кылааска Килижекова М.П. Т.Е.Сметанина “Саллаат ахтылҕана” айымньытынан күүстээх санаа, хорсун быһыы, албан аат туһунан аһаҕас урок, алтыс кылааска — Егорова М.Е. туохбарыта дьиэ кэргэнтэн саҕаланарын туһунан, сэттис кылааска — Старостина С.А. Т.Е. Сметанин «Лоокуут уонна Ньургуһун айымньытынан» саха үтүө үгэстэригэр аналлаах урок, ахсыс кылаастарга Фёдорова В.В оҕолоох ыалтан оннооҕор уот иччитэ үөрэрин туһунан аһаҕас уруок, онус кылааска Кузьмина М.М. «Семья как хранилище нравственности по роману Л.Н. Толстого “Война и мир”. Дома Ростовых и Болконских» диэн нуучча литературатыгар уруок, тохсус, уон биирис кылаастарга Аргунова А.П. «Письма, написанные сердцем…!» нуучча литературатын уруогун ыыттылар. Бу кэнниттэн 2-с уруогунан 1 кылааска Гуляева В.Н., Н.А. Лугинов «Чыркымай» айымньытынан «Уол оҕону иитии үгэстэрэ»; 3 кылааска Гуляева Д.А. «Дьиэ кэргэн үгэстэрэ кылаас чааһа”; 4 кылааска Гуляева А.Е. «Мин дьиэ кэргэним гиэрбэтэ”; 5 кылааска Петрова Е.А. Т.Е.Сметанин “Күөрэгэй остуоруйатынан киһиэхэ үтүө майгыта – көтөр кыната” дьарык; 6 кылааска Килижеков В.В. остуол оонньууларын; 7 кылааска Дьяконова З.Н. дьиэ кэргэн төрүччүтүн туһунан; 8 кылааска Килижекова А.Э дьиэ кэргэнинэн эти-хааны эрчийэр дьарык; 9, 11 кылаастарга Григорьева С.С. Трагедия ЧАЭС диэн оҕо аймах сэргиит, төрөппүт хайгыы истэр, көрөр дьарыктарын ыыттылар.
Киэһээ өттүгэр “Түмсүү” сынньалаҥ киинигэр улахан тэрээһин Н.Х. Дьяконов аатынан орто оскуола директора А.П. Аргунова Дьиэ кэргэн сылынан эҕэрдэ тылынан саҕаланна. Олохтоох библиотекарь Кондакова С.В. саха суруйааччыларын айымньыларыгар дьиэ кэргэҥҥэ иитии туһунан билиһиннэрдэ. Декада иһинэн ыытыллыбыт үлэлэри, «Эйэлээх дьиэ кэргэн -олох төрдө» видеоролик күрэһин түмүгүн Старостина С.А. уонна Охлопкова Ю.С. билиһиннэрдилэр. Бу кэнниттэн саха тылын уонна литературатын учуутала, театральнай студия салайааччыта Вера Васильевна Федорова норуодунай суруйааччы В. С. Яковлев- Далан «Дьикти саас» сэһэнинэн үөрэнээччилэри, төрөппүттэри, ыччаты түмэн, «Дьикти саас» спектаклы туруорда. Салайааччы айымньы ис хоһоонун толору арыйар сценарий суруйбут. Вера Васильевна спектакльга муспут «артыыстара» кыһаллан туран бэлэмнэммиппит, оруолларбытыгар уонна кэмигэр сөп түбэһэр таҥас-сап биир сүбэнэн булуннубут уонна кыһаллан туран оонньоотубут. Биир бэйэм 4 этиилээх оруолбун нэдиэлэни быһа бэлэмнэнэн син таппыт уонна сүрүнэ, улахан үлэҕэ кыттыһан ылбыппын астынным.
Оскуола коллективыгар инникитин даҕаны айымньылаах үлэҕит үрдүк таһаарыылаах, ситиһиилээх буола турарыгар баҕа санаабытын тиэрдэбит.
Екатерина Архипова.