Бүтэһик чуораан чугдаарда

Быйыл Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Кэбээйибит улууһугар Култуурунай нэһилиэстибэ, Сииттэбитигэр Аҕа сылларыгар, В.Е. Колмогоров аатынан Сииттэ орто оскуолатыгар оскуола араас сүһүөхтэрин бүтэрэр выпускниктарын «Бүтэһик чуораана» буолан ааста.

Бырааһынньыгы биһиги 8-с кылаас оҕолоро тэрийэн ыыттыбыт, салайааччыбыт Р.А. Винокурова.

4-с кылааска 7 оҕо ситиһиилээхтик бүтэрдилэр, кылаас салайааччыта Агафья Николаевна Дьяконова. 9-с кылааска 7 оҕо, кылаас салайааччыта Марианна Петровна Степанова. Бу күн саамай тутаах дьоннорун, оҕо саастыын арахсар, олох киэн аартыгар үктэнэр бэлиэ күннэринэн буолаллар 11-с кылаастар, кылааскаоҕо баар, кылаас салайааччыта Мария Александровна Яковлева.

Нэһилиэкпит баһылыга Семен Тимофеевич Тимофеев бу үөрүүлээх күҥҥэ оскуолабыт оҕолоругар эҕэрдэ тылын тириэртэ.

9 уонна 11 кылаас үөрэнээччилэрэ сүрүн уонна орто оскуоланы түмүктүүр биир кэлим экзамеҥҥа киирбиттэрин туоһулуур бирикээһи аахта уонна үөрэнээччилэргэ ситиһиини баҕарда оскуолабыт директора Андрей Викторович Новгородов.

Кэбээйи улууһун үөрэҕин сэбиэдиссэйин Ирина Михайловна Неустроева эҕэрдэ тылын иһиттибит.

4-9-11 кылаас оҕолоругар кылаастарын салайааччылара эҕэрдэ тылларын уонна умнуллубат бэлэхтэрин туттардылар.

11 кылааһы бүтэрэр выпускниктарга ааҕарга-суруйарга үөрэппит, билии киэҥ аартыгар сиэтэн киллэрбит бастакы учууталлара Ульяна Васильевна Петрова эҕэрдэ тылын оҕолоругар тириэртэ. Ону тэҥэ улууспут депутата Софья Денисовна Николаева оҕолорго эҕэрдэ тылын эттэ.

Хас биирдии оскуолаҕа Арассыыйа үрдүнэн үөрэнээччилэр биир сомоҕо хамсааһыннарын иһинэн ыытыллар үлэҕэ көхтөөхтүк кытынныбыт. Бу үөрүүлээх күннэ «Самолетики будущего» акцияҕа кыттыстыбыт.

«Төрөөбүт Сахабыт сирин сайыннара туруҥ, дойдугутугар туһалаах дьон буолуҥ» — диэн түөлбэ салайааччылара эҕэрдэ тылларын эттилэр, өйдөбүнньүк бэлэхтэрин туттардылар. Төрөппүт комитетын председателэ Марианна Семеновна Захарова оскуола оҕолоругар төрөппүттэр ааттарыттан эҕэрдэ тылларын тириэртэ уонна оскуоланы бүтэрээччи оҕолорго өйдөбүнньүк бэлэхтэри туттартаата.

Хас сыл аайы үгэскэ кубулуйбут биһиги ытыктыыр, убаастыыр учууталбыт Аграфена Александровна Сивцева сырдык кэриэһигэр төрөппүт оҕолорун аатыттан сыллата бэриллэр бириэмийэни 4с кылаас үөрэнээччитэ Петров Алихаҥҥа бэрилиннэ. Бу бириэмийэни туттарда Анна Лазарьевна Сивцева.

Тиһэх чуорааны чугдаардар чиэс оскуолабыт быйылгы 2024 сыл выпускниктара алтан чуорааны тыаһатан, арыалланан бочуоттаах эргиири оҥордулар.

Оһуокай күнүгэр

Саха өрөспүүбүлүкэтин Ил Дархана Айсен Николаев балаҕан ыйын 7 күнүгэр 2023 сыллаахха Оһуокай күнүн олохтуур туһунан Ыйаахха илии баттаабыта. Ыйаах Арассыыйа норуоттарын култуураларын үйэлээх баайын — саха төрүт үҥкүүтүн «Оһуокайы» харыстыыр уонна тарҕатар соруктаах. Оһуокай күнэ – ыам ыйын 25 күнүгэр сыл ахсын бэлиэтэнэр буолбута.

Бу күн биһиги аһаҕас халлаан анныгар оскуолабыт дьиэтин иннигэр Оһуокай күнүн бэлиэтээтибит. Оскуола коллектива, үөрэнээччилэрэ  уонна төрөппүттэр бары биир киһи курдук бу күнү бэлиэтээтибит. Оһуокайы таһаардылар оскуолабыт 2, 4 уонна 8 кылааһын оҕолоро уонна  кыраайы үөрэтэр түмэлбит салайааччыта Сивцева А.Л., оскуолабыт уопуттаах учуутала Левина О.Д., оһуокайы түмүктээтэ директорбыт Новгородов А.В.

Норуоппутун арчылыыр, араҥаччылыыр, сомоҕолуур аналлаах оһуокайбыт үйэлэргэ дуорайа туруохтун!                                                           

Оля ТимофееваВ.Е. Колмогоров аатынан Сииттэ орто оскуолатын 8-с кылааһын үөрэнээччитэ.