Ыччаты кэскилгэ угуйар
Сулус этэ комсомол,
Эдэри үлэҕэ күүрдэр
Сыаллаах этэ комсомол.
Комсомол төрүттэммитэ 105 сылыгар аналлаах эдэр сааһы эргитэр, ааспыт кэми ахтыһар «Албан ааттаах комсомол»диэн Мастаах бөһүөлэгэр норуот айымньытын дьиэтигэр эҕэрдэ кэнсиэрт буолан ааста.
Үгүс элбэх дьон ордук аҕа уонна орто саастаах көлүөнэ дьылҕата комсомолу кытта ыкса сибээстээх. Комсомолга киирэн ыччат дойду олоҕун бары эйгэтигэр актыыбынайдык кыттара уонна бэйэтин дьылҕатын, дойду, норуот бүттүүнүн дьылҕатын иһин эппиэтинэстээҕин билинэрэ. Комсомол күүрээннээх үлэтиттэн тирэх ылбыт дьоммут билигин да эдэр дууһалаахтар араас тэрээһиннэргэ көхтөөхтүк кытталлар.
Ол курдук, кэнсиэркэ Мастаах нэһилиэгин түмсүүлэрэ кыттыыны ыллылар. Кылгастык кэнсиэрт туһунан сырдатыам. Кэнсиэрт иннинэ урукку-хойукку 80-90 сс. хаартыскалар көһүннүлэр. Аһыллыытыгар 6 кылаас оҕолоро, кылаас салайааччыта Майя Июльевна Егорова пионер оруолун бэркэ оонньоотулар, андаҕар тыллары Сайаана Кононова иилээн-саҕалаан, саҥаран -иҥэрэн толордо. Ол кэнниттэн быйылгы выпускниктарбыт комсомол андаҕар тылларын этэн-тыынан салҕаатылар. Дьэ, бу кэнниттэн биһиги нэһилиэк биир баар суох далбар хотуттарбыт, «Иэйии»ансаамбыл толоруутугар «Комсомол»диэн ырыаны ыллаатылар, салайааччы Павлова Антонина Иосифовна. Урукку ырыалары, сыаҥкалары, ретро муоданы, көрдөөх үҥкүүнү бэлэх ууннулар «Тускулаана» түмсүү, салайааччы Нина Петровна Михайлова. Сыана бэтэрээннэрэ бу киэһэҕэ үөрүүлэрин тэҥҥэ үллэстэ, ырыа кэһиилээх кэллилэр эдьиийдээтэр эдьиийбит, ырыаһыт-тойуксут, хоһоонньут, иистэнньэҥ Марина Даниловна Комарова. Хомоҕой хоһоонунан этэ-тыына бар дьонун үөрдэ-көтүтэ кэллэ, сыана бэтэрээнэ ырыаһыт Марина Фёдоровна Обутова «Өрүөл кэриэһэ» бэркэ аахта.
Ити курдук комсомол күнүн бэрт сэргэхтик ыллыбыт, атаардыбыт. Ытыктабыллаах комсомол бэтэрээннэрэ, эһиги айымньылаах үлэҕэ күүскүтүн холбоотоххут, улуускут, өрөспүүбүлүкэҕит сайдар суолугар кылааккытын киллэрбиккит. Ыарахантан чаҕыйбакка үлэттэн куоппакка, олох хардыытынан дойду сайдарыгар күүскүтүн уурбуккут, санааҕытын холбообуккут сыаналанан үлэһит үтүөлэрэ буола дьон махталын ылаҕыт диэн тэрээһин түмүктэнэр.
Сардана Жакипова, Мастаах бөһүөлэгэ
