Быйыл Тыайа нэһилиэгэр «Төрөөбүт дойдуга –Махтал» сыла биллэриллибитэ. Ол чэрчитинэн, сэтиннньи 6-11 күннэригэр Саха Республикатын үтүөлээх юриһыгар, РФ прокуратуратын бочуоттаах үлэһититигэр Николай Егорович Полятинскайга аналлаах үгүс үлэ ыытылынна.
Үлэлэр биир дойдулаахпыт олоҕун, үлэтин оҕо-аймах, дьон-сэргэ билиитигэр таһаарар, аатын үйэтитэр сыаллаах-соруктаах бардылар. Ол курдук, оскуола үөрэнээччилэригэр сүһүөхтэринэн оҕо сааһын, оскуолаҕа үөрэммит сылларын, үлэтин билиһиннэрэр «Дьоһуннаах кэпсэтии», үөрэнээччи, общественность уонна аймахтара кыттыылаах “Биир дойдулаахпыт — суут –сокуон эйгэтин дьоһуннаах үлэһитэ” педсовет-конференция, музейнай-библиотечнай уруоктар, кини аатыгар нэһилиэк тэрилтэлэрин иһинэн волейболга күрэхтэһии буолла. Күрэхтэһиини аймахтара тэрийэн ыыттылар.
Маны тэҥэ, Николай Егорович олоҕун-үлэтин кэпсиир кинигэлэр, хаартыскалар, тус бэйэтэ тутта сылдьыбыт тэриллэрэ быыстапкаҕа турдулар.
Сэтинньи 11 күнүгэр “Ахтан –санаан ааһыаҕыҥ” диэн тэрээһин үрдүк таһымнаахтык буолан ааста. Бу тэрээһини Н.Е. Полятинскай бииргэ үөрэммит доҕотторо, Кэбээйи орто оскуолатын 1970 сыллаах выпустара, педагогическай наука кандидата, ХИФУ доцена Аксинья Дмитриевна Обутова салайааччылаах иилээн-саҕалаан ыыттылар. Кинилэр бииргэ үөрэммит доҕордорун туһунан олус истиҥ ахтыылары оҥордулар, үөрэммит сылларын эрэ буолбакка, олохторугар алтыспыт кэмнэрин кэпсиир дириҥ ис хоһоонноох, хас биирдиилэрин тус бэйэтин архыыбыттанхомуллубут презентацияны, видеоролигы билиһиннэрдилэр. Түмүллүбүт матырыйаалы Николай Егорович аймахтарыгар уонна оскуолаҕа бэлэх ууннулар.
Николай Егорович убайдара Афанасий Егорович, Николай Спиридонович, Семен Спиридонович Полятинскайдар, эдьиийэ Мария Михайловна Дьяконова бырааттарын оҕо сааһын, төрөппүттэрин туһунан кэпсээтилэр. Быйылгы үөрэх сылыттан аймахтара Николай Егорович аатынан оскуола үөрэнээччилэригэр стипендия олохтообуттарын туһунан убайа Афанасий Егорович билиһиннэрдэ.
Тэрээһиҥҥэ оскуола үөрэнээччилэрэ «Мин төрөөбүт Ийэ дойдум» литературнай композициянан, орто сүһүөх уонна үрдүкү кылаас кыргыттара эдэр учууталларын кытта “Оҕо саас”, “Махтал” үҥкүүнэн, “Кэнчээри” оҕо тэрилтэтин үлэһиттэрэ Николай Егорович кэргэнин саамай сөбүлээн ыллыыр “Листья желтые” ырыатынан үҥкүү туруоран кыттыыны ылан, дьон-сэргэ биһирэбилин ыллылар.
Ону сэргэ Николай Егорович бииргэ төрөөбүт убайа, Афанасий Егорович Полятинскай, көҕүлээһининэн кэлбит ыалдьыттарга аймахтара “Күндээдэ” эбэҕэ ыалдьыты көрсүү сиэринэн, балыктааһын биир көрүҥүн, муус аннынан илимнээһини тэрийэн, ыалдьыттары үөртүлэр-сөхтөрдүлэр. Киэһэ өттүгэр аймахтара тэрийбититии астаах мааны остуол тула олорон иһирэх кэпсэтиинэн бу күн түмүктэннэ.
Оскуола, нэһилиэк иһинэн ыытыллыбыт тэрээһиннэр кэм, көлүөнэ алтыhыытын cитимниир, кэлэр көлүөнэни төрөөбүт дойдуга бэриниилээх, биир дойдулаахтарынан киэн тутта улааталларыгар биир ураты үтүө холобур буолуохтара диэн эрэнэбит.
Саргылана Старостина, директоры иитэр үлэҕэ солбуйааччы
М.М. Кузьмина хаартыскаҕа түһэриитэ.