Аҕа дойду сэриитин Кыайыы 79 сылын бэлиэтиир үтүө мааны күн

Улуу Кыайыыны уһансыбыт Ийэ дойду туһугар сырдык тыыннарын толук уурбут хорсун буойуннарга, тыылга үлэлээбит ытык кырдьаҕастарга, сэрии тулаайахтарыгар, сэрии кэмин оҕолоругар сүгүрүйэр ытык күммүт буолан ааста.

Кальвица сэлиэнньэтигэр бука бары өрө көтөҕүллэн тэрилтэлэринэн «Хатыҥчаан» оҕо уһуйаачыта М.Б. Новгородова, сынньалаҥ киин салайаачыта А.И. Охлопкова, олохтоох библиотека үлэһитэ Е.В. Гуляева, оскуола оҕо хамсааһынын салайааччыта А.А. Никифорова «Далбар эбээлэр» түмсүүлэрэ салайааччы Е.Е. Гуляева көҕүлээһиннэринэн ытык дьоммутугар махталлаах Улуу кыайыы 9 Маай күнүн үөрэ-көтө көрүстүбүт.

Сырдык санааннан салайтаран, инникитин эйэлээх олоҕу түстэһэн, биир сомоҕо буолан кэлэр кэнчээри ыччаттарбыт, кэскиллэрбит аан бастакыннан ырыа ыллаан, хоһоон ааҕан доргуттулар, ытык дьоммут сүрэхтэрин үөртүлэр. Уонна аалай гвоздика сибэкки дьөрбөтүн туттардылар. «Куокуй нэһилиэгин дьаһалтатын аатыттан эҕэрдэ сурук уонна аһынан паёк туттардылар. Аҕа дойдуларын көмүскүүр «Барыта фронт туһугар» диэн ыҥырыыннан салайтаран тыылга бэйэлэрин харыстаммакка утуйары, сынньанары умнан туран араас байыаннай сакааһы толорбуттара. Ол курдук, балыктааһын, түүлээх туттарыллыбыта, түүлээх таҥас-сап бэлэмнэммитэ, таас чох хостоммута — бу барыта хаалбыт оҕолорго, дьахталларга, кырдьаҕастарга сүктэриллибитэ.

Кальвица Аҕа дойдутун сэриитин тыыл ветерааннара 97 сааһыгар сылдьар Бочуот бэлиэтин хаһаайына, Судаарыстыбаннай бириэмийэ Луареата, Кэбээйи улууһун бочуоттаах олохтооҕо, үлэ, тыыл бэтэрээнэ Азаров Григорий Алексеевич, 93 саастаах Гуляева Христина Игнатьевна — үлэ, тыыл бэтэрээнэ, Кэбээйи улууһун бочуоттаах олохтооҕо. Сэрии кэмин тулаайаҕа, бочуоттаах Шахтёр Левин Николай Капитонович. Сэрии кэмин оҕолоро: Архипова Мария Николаевна, Левина Мария Касьяновна, Гуляев Афанасий Петрович, Павлова Анна Алексеевна, кинилэргэ анаан оскуола оҕолоро «Аҕа дойлу сэриитин суолунан» — монтаж оҥорон, көрдөрөн дьон сэргэ биһирэбилин ыллылар. Олохтоох сэлиэнньэ үлэһиттэрин күүһүнэн байыаннай ырыалар ылланнылар, эдэр ыччаттар үҥкүү толорон дьон сүргэтин көтөхтүлэр. Ону тэҥэ, тэрилтэлэр бары бэтэрээннэргэ анал ас бэлэхтэрин эҕэрдэлээн туран туттардылар. Оскуола үлэһиттэрин көҕүлээһининэн «Полевой кухня» тэрилиннэ .

Кыайыы 79 сылын үөрэн-көтөн, инникигэ эрэллээх түмүктээтибит. Эйэлээх ыраас халлаамытыгар хаһан да хараҥа былыт бүрүүкээбэтин бу буола турар быһыы-майгы биһиги олохпутун аймаабатын, оҕолорбут барахсаттар кыайыы көтөллөөх дойдуларыгар эйэлээх олохторугар этэҥҥэ эргилининнэр диэн Үрдүк Айыыларбытыттан көрдөһөбүт! Улуу Кыайыы 80-н сылын күндү бэтэрээннэрбит чэгиэн, доруобай, бүгүҥҥүлэрин курдук көрсөллөрүгэр баҕарабыт.

 Екатерина Гуляева, Кальвица сэлиэнньэтэ