Куокуй нэһилиэгин Арҕас бөһүөлэгэ нэһилиэк быһыытынан сурукка киирэн төрүттэммитэ 90 сылын чэрчитинэн «Куокуй нэһилиэгин Арҕас бөһүөлэгин «Үлэҕэ Албан Аат» уонна » Ийэҕэ махтал» өйдөбүнньүк стендэлэр аһыллыыларын үөрүүлээх тэрээһинэ буолан ааста.
Тэрээһини олохтоох дьаһалта баһылыга Лев Николаевич Павлов эҕэрдэ тылынан, өйдөбүнньүк стендэлэри үөрүүлээхтик арыйыы сиэринэн-туомунан саҕаланна. Тэрээһиҥҥэ оҕо лааҕырын иитиллээччилэрэ, ийэ туһунан истиҥ ырыалаах Сардана Николаевна Егорова кыттыыны ыллылар.
Эҕэрдэ тыллары бырайыак ааптара Нина Егоровна Олесова, улуус бочуоттаах олохтооҕо Иванов Геннадий Васильевич, тыа хаһаайыстыбатын бэтэрээнэ Гуляев Михаил Михайлович, герой ийэлэр ыччаттара Васильева Сардана Иннокентьевна, Игнатьева Людмила Петровна долгуйан туран бырайыак олоххо киирбитинэн эҕэрдэлээтилэр, махтаннылар.
Дьоһун олоҕу олорон ааспыт нэһилиэкпит үтүөкэн үлэһит дьоммут олохторун кэпсиир өйдөбүнньүк стендэлэр кэлэр кэнчээри ыччаппытыгар үтүө холобур, история кэрэһитэ буолан сырдыкка,кэрэҕэ угуйа туруоҕа…
Нина Олесова