Аламай күммүт мичийдэ,
Таһырдьа угуйа ыҥырда,
Ырыа-тойук дэлэйдэ,
Оҕо-аймах муһунна.
Оҕо көмүскэлин күнүгэр Мукучубут нэһилиэгин оҕолоро, сарсыарда уон биир чаастан «Дайан» сынньалаҥ киинигэр тоҕуоруһа муһуннулар.
Бырааһынньыктааҕы тэрээһиҥҥэ Иннокентий Левин — «Кылыы Боотур» остуоруйа-поэматын алын сүһүөх кылаас оҕолоро куукуланан оонньоон көрдөрдүлэр. Остуоруйа алыптаах эйгэтигэр көрөөччүлэри умсугута угуйда сэһэнньит — Туйаара Степанова. Остуоруйа эмиэ олоҥхо курдук омуннаах, олох курдук оһуордаах, оонньуу-көр аргыстаах, кыайыы-хотуу үктэллээх буоларын итэҕэтиилээхтик куукуланы хамсатан, сири-дойдуну көрдөрөн, көтөрү-сүүрэри көтүтэн бэрт табатык оонньоон көрөөччүгэ тиэртилэр, биһиги кырачаан доҕотторбут. Көрбүт эрэ барыта кэрэхсээтэ, умсугуйа ылларда. Бэл диэтэр остуоруйа бүтүөн баҕарбатылар. Чахчы оҕо сэргии көрөр, истэр остуоруйата буолла.
Остуоруйаҕа куукуланы хамсатыы уустугун оҕолор эттэринэн-хааннарынан билэн элбэххэ үөрэннилэр, бэйэ-бэйэҕэ көмөлөсүһэн үөрдүлэр, эһиилги үөрэх дьылыгар саҥа сонун остуоруйалары туруорарга былааннаатылар. «Дэриэбинэчээн» норуот тыйаатырын режиссера Саргылана Иванова оҕолорго махтал суруктары, минньигэс сакалааттары бэлэх уунна. Маны тэҥэ «Дайан» сынньалаҥ киин салайааччыта Каролина Кудрина доруобуйаларынан хааччахтаах оҕолорбутугар үөрэх сыла түмүктэммитинэн минньигэс сакалааттары утары уунна.
Остуоруйа кэнниттэн бука бары сиэттиспитинэн кулууп тиэргэнин киэргэммит кэрэчээн сыанатыгар ырыа-тойук дэлэйдэ. «Кэнчээри» оҕо уһуйаанын бүтэрэн, билии киэҥ аартыгар үктэнэр, саҥа оскуола боруогун аттыллыыр кырачаан выпускниктары дохсун ытыс тыаһынан арыаллаан көрүстүбүт. Кырачааннарбыт ырыа бэлэхтээх кэлэн бар дьоннорун үөртүлэр. Эдьиийдэр, убаайдар эрчимнээх ырыалара түһүлгэҕэ мустубут оҕолору барыларын биир ситим үҥкүүгэ угуйда. Оҕолорбут талааннара сыл аайы арыллан иһэриттэн долгуйа үөрдүбүт, минньигэс бэлэхтэри туттардыбыт.
Эҕэрдэ концерт кэнниттэн Экстра синема киинэ саалатыгар киирэн «Морской монстр» ойуулугу көрүү буолла. Ойуулук бүппүтүгэр оҕолорбут ытыс таһынан астыммыттарын биллэрдилэр. Мантан ыла киинэ саалата көрөөччүлэригэр аанын арыйыаҕа. Онон кырачаан доҕотторбутугар сайыҥҥы сынньалаҥы сэргэхтик атаарар, доҕоттору кытта көрсөр бэртээхэй күннэр үүннүлэр.
Бүгүн чахчыта да күнү кытта сырса оонньоото, ыллыы-туойа чуопчаарда, күлэ-үөрэ мичээрдэ, оҕо саас. Оҕо — барыбыт дьолбут!
Вера Прокопьева, Мукучу.