Бүгүн сандал сааһы уруйдуу, сылын аайы бэлиэтэнэр ыам ыйын 15 күнэ -Аан дойду дьиэ кэргэнин күнүнэн бигэргэммитэ.
Ол курдук, 2024 сыл Россияҕа Дьиэ кэргэн сыла бэлиэтэнэр. Биһиги бу үөрүүгэ аламаҕай күнү көрсө 50 сыл устата истиҥ иэйии тапталга куустаран, 50 сыл дьоллоох, күн күбэй күндү ийэ, сайаҕас эбээ, аҕалаатар аҕа, күндү эһээ аатын ааттатан, 50 сыл кэнчээри ыччат, оҕо, сиэн, хос сиэн дьолун билбит нэһилиэкпит саамай убаастыыр дьоммутун Екатерина, Николай Егоровтар ыал буолан олорбуттара оруобуна 50 сылынан итиитик -истиҥник эҕэрдэлээтибит.
Бу үөрүүгэ кыттыһа кэллилэр эрчимнээх эдэр сааһын аргыстара, дьүөгэлэрэ, үлэҕэ алтыспыт биир идэлээхтэрэ, аймах билэ бар дьонноро дьоро күннэригэр кэрэ кэпсээн, ырыа, үҥкүү кэһиилээх кэллилэр. Кэбээйи улууһун 2-с Лүүчүн нэһилиэгэр, тумус туттар дьоммут Екатерина Иннокентьевна, Николай Прокопьевич Егоровтар Алаһа дьиэ тэринэн, төлкөлөөх түһүлгэни төрүттэммиттэрэ үйэ аҥаардаах үбүлүөйдэринэн итии-истиҥ эҕэрдэ!
50 сыл анараа өттүгэр муус устар 13 күнүгэр 1974 с. 2-с Лүүчүн нэһилиэгэр Егоровтар диэн саҥа дьиэ кэргэн төрүттэммитэ, уйалара кыыс оҕоннон айхалламмыта, уол оҕоннон уруйдаммыта. Кинилэр иллээх дьиэ кэргэннэригэр биэс оҕону кынаттаан көтүтэн, билигин уонтан тахса сиэннээхтэр, хос сиэннээхтэр. Егоровтар үлэни өрө туппут ыал. Улуустарын, нэһилиэктэрин сайдыытыгар бэйэлэрин сэмэй кылааттарын уга сылдьаллар. Ол туоһута, дьиэ кэргэн аҕа баһылыга Николай Прокопьевич Ил Түмэн бочуотунай грамотатынан наҕараадаламмыта, Саха Өрөспүүбүлүкэтин тыа хаһаайыстыбатын министиэристибэтин сайдыытыгар кылаатын иһин, Кэбээйи улууһун сайдыытыгар кылаатын иһин бэлиэлэр хаһаайына, Танара орто оскуолатын «Бочуоттаах выпускнига». Дьиэ кэргэн Далбар Хотуна Екатерина Иннокентьевна Саха Өрөспүүбүлүкэтин култууратын министиэристибэтиттэн махтал сурук, Саха Өрөспүүбүлүкэтин оҕо уһуйаана 100 сылынан, Оҕо уһуйаана сайдыытыгар кылаатын иһин наҕараадалардаах, Кэбээйи улууһун №17 «Чуораанчык» оҕо уһуйаанын бочуоттаах үлэ бэтэрээнэ.
Екатерина, Николай Егоровтар нэһилиэгин дьонуттан убаастабылы ылыахтарын ылаллар, эдэр көлүөнэҕэ дьиэ кэргэн холобура буолаллар. Быйыл муус устар 12 күнүгэр 2024 сылга Егоровтар дьиэ кэргэн Саха Өрөспүүбүлүкэтин «Семейная доблесть» бэлиэ хаһаайыттара буоллулар. Саха Өрөспүүбүлүкэтин бырабыытылстыбатын Загсыттан «Кыһыл көмүс сыбаайба» сибидиэтилистибэтэ туттарылынна, Саха Өрөспүүбүлүкэтин Ил Дарханыттан Айсен Сергеевич Николаевтан эҕэрдэ сурук, Саха Өрөспүүбүлүкэтин Ил Түмэниттэн махтал сурук туттарылыннылар. Ытык дьоммутугар баҕарабыт ыраас халлааны, чугас дьоҥҥут сылаас сыһыаннарыгар уйдаран этэҥҥэ чэгиэнник сылдьаргытыгар, аал уоккут унаар буруота уһун үйэлэргэ унаара турдун!
Егоровтары чиэстиир үөрүүлээх чааска эҕэрдэлии кэллилэр Кэбээйи улууһун 2-с Лүүчүн нэһилиэгэ муниципальнай тэриллиитин дьаһалтатын Загс боломуочунайын үлэһитэ Аграфена Семёновна Ксенофонтова. Бу үөрүүгэ кыттыһан кэрэ үҥкүүнэн ымыы чыычаах оҕолорун кытта үҥкүүлүү кэллилэр «Талбаана» түмсүү, салайааччы Аксинья Михайлова. Ийэ кыыһынаан ыаҕыйалаах үҥкүүнэн киэргэттилэр. Дьиэ кэргэн күнүнэн эҕэрдэ тылы биэрэбит 2-с Лүүчүн аҕа баһылыгар Юрий Иванович Лепчиковка. Бүгүн истиҥ тылларынан, кэскили түстэһэн, күндү истиҥ дьүөгэлэрин үөрүүлээх күннэринэн эҕэрдэлииллэр иэйии куттаах, истиҥ ырыа кэһиилээх кэллилэр «Иэйии» ансаамбыла, салайааччы Антонина Павлова. Екатерина Иннокентьевнаны бииргэ үлэлээбит коллегалара, «Чуораанчык» уһуйаан сэбиэдиссэйэ Александра Николаевна Семёнова эҕэрдэлээтэ. Уһуйаан иитээччилэрэ үҥкүүнэн бүгүҥҥү киэһэни киэргэттилэр. «Тускулаана» түмсүү, салайааччы Нина Петровна Михайлова, эҕэрдэ эйэҕэһин үбүлүөйдээх дьоммутугар анаатылар. Үҥкүүлэрин бэлэх ууннулар. Айар талба талааннаах, айар куттаах дьоҕурдаах нэһилиэкпит саамай бастыҥ көхтөөх ыалларын эҕэрдэлииллэр Степан Васильев аатынан норуот айымньытын дьиэтин кэлэктиибэ. Ылбаҕай ырыатынан бар дьонун үөртэ Ариан Дьяконов. Егоровтар дьиэ кэргэн 50 сыл үбүлүөйдээх сылларынан эҕэрдэлэрин тиэрдэллэр Н.П. Егоров аатынан Мастаах орто оскуолатын кэлэктиибин аатыттан Маргарита Прокопьевна Баишева.
Дьэ, ити курдук, Дьиэ кэргэн күнүн үбүлүөйдээх дьоммутун сахалыы сайаҕас санаалаах, саха тыыннаах, чөл туруктаах, айар алыптаах дьоһун дьоллоох олохтоох, бигэ тирэхтээх үтүө дьоҥҥо Екатерина Иннокентьевна, Николай Прокопьевич Егорвтарга ананна. Баҕарабыт дьол туһугар дьулуһан, тапталгытын туоһулаан өссө да уһуннук оҕо-сиэн тапталыгар уйдаран үөрэ-көтө олоруҥ. Ил -эйэ эҥээрдэстин, холумтаҥҥыт сылаас салгынынан сыдьаайдын, олоххут баай байылыат буолуохтун.
Сардана Жакипова, Мастаах нэһилиэгэ.