Кэбээйитээҕи орто оскуола нэдиэлэ түмүктэрин таһаарар үтүө үгэстээх. Понедельниктааҕы линейкалара Россия былааҕын туйгун үөрэхтээх оҕолор көтөҕүүлэриттэн саҕаланна. Ааспыт нэдиэлэҕэ үөрэнээччилэр араас республиканскай өбүгэ оонньууларыгар, күрэхтэригэр маастар норматын толорон үрдүк ситиһиилэммиттэргэ наҕараадалары туттардылар.
«Оскуола олоҕун араас күрэхтэрин, акцияларын түмүктэрин таһаардылар. Ити кэннэ түгэн биэрэн тыл биэрдилэр. Биһиги дьиэ кэргэн сахалыы балаҕаммытыгар «Алампа Ааҕыыларын» ыыппыппытыгар 98 оҕо, учуталлар, төрөппүттэр уонна нэһилиэкпит уон түмсүүтүттэн сэттэтэ бу ааҕыылары көҕүлээһиҥҥэ барыта сүүстэн быдан тахса киһи кыттыбытын бэлиэтээтим. Күннэтэ «Сахалыы Саҥа Сатараатын, Саха Дорҕооно Дуораһыйдын!» диэн Алампа Убайбыт кынаттаах этиитин толорон биһиги «Өбүгэ үгэһин сөргүтүү» бөлөх үгэс курдук тэрээһиммит быйылгы кыттыылаахтара сахалыы таҥнан көмүлүөк иннигэр туран хоһоон ааҕан, ырыа ыллаан , композициялары толорбуттарын киһи эрэ кэрэхсии көрөн харах хайҕыыр, сэргии истэн сүрэх манньыйар үтүө түгэн кэрэ көстүү буолар.
Түгэнинэн туһанан ааҕыыларга оҕолору кытыннарбыт учууталларга, төрөппүттэргэ ис сүрэхпиттэн махтанан туран «Алампа Ааҕыыларын» түмүгүнэн миэстэлэспиттэргэ грамоталары, кылаан кыайыылаахтарга бириистэри, түмсүүлэр туруорбут «Анал ааттарын» уонна Балаҕаным Хайҕалын туттартаатым», — диэн сонунун кэпсиир Елизавета Константиновна Софронеева.
