Тыайа нэһилиэгэр сыл бэлиэтигэр ананар тэрээһиннэр өрүү ыытыллаллар. Буоларын курдук, быйылгы тэрээһин эмиэ үрдүк таһымнаахтык ааста. Ол курдук, «Түмсүү» сынньалаҥ кииммитигэр оҕо ийэтинээн кэпсэтэриттэн саҕалаан, «Кэнчээри» уһуйаан Раиса Лопатина уонна Н.Х.Дьяконов аатынан орто оскуолабыт алын сүһүөх учуутала Акулина Гуляева үҥкүүгэ дьарыктыыр оҕолоро кыраттан улаханыгар тиийэ дириҥ ис хоһоонноох түгэни бэлэхтээтилэр, иитээччилэр оҕолорунаан хоһоон ааҕан, оонньуурдарын кытары кыттыһыннаран, Саха Республикатын Ил Дарханын биллэрбитинэн «Оҕо саас» сылыгар анаммыт түгэни бэлэх ууннулар.
Бу кэнниттэн, Аҕа баһылыкпыт Сидор Дьяконов уһуйааммыт эдэркээн, кэскиллээх сэбиэдиссэйэ Мария Захароваҕа, уонна элбэх сонун санаалардаах, опыттаах директор Азалия Аргуноваҕа сыл бэлиэтин туттарда. Мантан салгыы, эдэркээн дьиэ кэргэнниилэр, Айна, Василий Килижековтары кытта Сусанна уонна Иван Григорьевтар нарын үҥкүүлэринэн дойдубут президенын Владимир Путин уурааҕынан, 2024 сыл Россия үрдүнэн «Дьиэ кэргэҥҥэ» анаммытын кэрэһэлээтилэр. Көрөөччүлэр бу эдэркээн ыалларбытыгар дохсун ытыс тыаһынан хайҕалбытын биллэрдибит. Бу түгэҥҥэ, нэһилиэкпит дьоһун, ытык ыала Семен Спиридонович уонна Валентина Алексеевна Полятинскайдар сыл бэлиэтин алгыс баһа сыалаан туран, саамай эдэр ыалбытыгар Сусанна уонна Иван Иванович туттардылар.
Кэбээйибит улууһугар «Өбүгэ ситимин култууратын» сылын сылын бэлиэтин Аҕа баһылыкпыт Сидор Дьяконов нэһилиэкпитигэр түмэли саҕалаабыт Мария Дьяконоваҕа уонна түмэл комплексын тэрийэ сылдьар Екатерина Архиповаҕа эрэли биллэрэн туран туттарда. Бу бэлиэ түгэни Екатерина Яковлевна салайар араас таһымҥа нэһилиэгин аатын ааттата сылдьар»Холумтан» түмсүү өбүгэ үгэстэринэн, кэрэ оҥоһуктарын көрдөрдүлэр.
Салгыы эр дьон түмсүүтэ төрөөбүт дойдуга анаммыт хоһооннору дьоһуннук аахтылар. Онтон республикаҕа биллэр «Күндээдэ» уолаттар ансамбыла киһини эрэ барытын долгутан, «Аҕам алааһа» ырыанан нэһилиэкпитигэр аҕа баһылыкпыт уурааҕынан «Аҕа сыла» саҕаламмытын бэлиэтээтэ. Онтон бу сыл бэлиэтин, саҥа анаммыт аҕа түмсүүтүн салайыахтаах, эдэр, эрчимнээх, элбэҕи эрэннэрэр Айсен Поповка туттарылынна.
Бу курдук, олус сэргэх дьоро киэһээ тэрээһинэ олохтоохтору нэһилиэкпит тупсар, сайдар кэскилин туһугар санаабытын үрдүккэ күүркэттэ, сырдыкка туһаайда.
Екатерина Архипова.
Хаартыскаҕа түһэрдэ Алла Дьяконова