Одун Хаан ыйыгар Мукучубут нэһилиэгэр бэрт сэргэх тэрээһиннэр тиһигин быспакка салҕаналлар. Ол курдук олунньу 7 күнүгэр «Дайан» сынньалаҥ киинигэр Аграфена Дмитриевна Макарова аатынан Дьокуускайдааҕы культура колледжын үҥкүү салаатын үһүс курсун студена Аэлита Павлова практикатын түмүктүүр, үлэтин көрдөрөр киэһэтэ буолан ааста. Биллэрин курдук тэрээһиннэрбит бука барыта Кыайыы сылыгар, дойдуга бэриниилээх буолууга ананаллар. Кэрэни кэрэхсиир күндү көрөөччүлэрбит сааланы толору мустан үҥкүү ытылҕаныгар уйдаран, алыптаах эйгэ абылыыр, умсугутар күүһүн биһирээн хас биирдии сыанаҕа тахсар кыттааччыны эрчимнээх ытыстарын тыаһынан доҕуһуоллуу көрүстүлэр. Биллэн турар кинилэр өйөбүллэрэ, долгуйууну киэр илгэн, саас сааһынан солбуһан, уот-күөс уларыйан, бииртэн биир сонун туруоруу тэтим эбэн дьүөрэлээн үҥкүү буолан ытыллан истэ.
Дьэ чахчы да талан үөрэнэ сылдьар идэни ис сүрэхтэн таптаан, үлэ түмүктээх буолуутун бар дьон дьүүлүгэр таһааран сыалы ситиһии бу элбэх сыраттан тахсарын бүгүҥҥү киэһэни бэлэхтээбит кыттааччылар уонна уһуйааччы Аэлита Николаевна итэҕэттилэр. Нэһилиэкпит Оҕо искусство оскуолатын үөрэнээччилэригэр, «Эрчим» үҥкүү бөлөҕөр, «Сайдыына», «Уруйдаана» түмсүүлэргэ, «Дэриэбинэчээн» норуот тыйаатырын артыыстарыгар, сынньалаҥ киин үлэһиттэригэр туруоруллубут үҥкүүлэр ураты тыыннаахтарын көрөөччүлэр сэргии, кэрэхсии көрдүлэр. Сырдыгынан сыдьаайар аптаах сыанабыт бу киэһэ хас биирдии киһи сүрэҕин кылын таарыйан, кэрэҕэ умсугута угуйбут буолуохтаах.
Түмүккэ Аэлитабытыгар махтал тыллар, эҕэрдэлэр этилиннилэр. Талан ылбыт идэтин баһылыырыгар, ыччат дьоҥҥо холобур буоларыгар, үҥкүү алыптаах аартыга саҥа саҕахтары арыйарыгар баҕара хааллыбыт.
Күндү көрөөччүлэрбитин үҥкүү абылыыр күүһүн эккитигэр-хааҥҥытыгар иҥэрэн туруккутун тупсарыҥ, хас үүнэр күнү ырыанан айхаллааҥ, үҥкүүнэн уруйдааҥ диэн алгыы хааллыбыт! Дьоро киэһэни уопсай хаартыскаҕа түһэн үйэтиттибит!
Вера Прокопьева, Мукучу нэһилиэгэ