Сииттэбит нэһилиэгин биир бастыҥ ыччата, учуутала, тренера Владислав Алексеевич Уваровскай сырдык кэриэһигэр аналлаах волейбол күрэҕэ олус сэргэхтик, тыҥааһыннаахтык, тэрээһиннээхтик ааста.
Барыта сэттэ хамаанда кыттыыны ылла. Ол курдук, Сииттэтэн икки уолаттар хамаандалара, биир кыргыттар хамаандалара, Сангаартан биир кыргыттар, биир уолаттар хамаандалара, ыраах Булуу Тыымпытыттан уолаттар уонна кыргыттар хамаандалара көхтөөх кыттыыны ыллылар. Көрөөччү дьон киэҥ — куоҥ заалга толору муһунна.
Күрэхтэһэ кэлбит ыалдьыттарбытын алгыстаах алаадьыннан, сахалыы сиэринэн — туомунан көрүстүбүт. Тэрээһиммит үөрүүлээх арыллыытын, эҕэрдэ тыл бастыҥын бар дьонугар анаан олохтоох дьаһалта баһылыга Семен Тимофеев эттэ. Истиҥ эҕэрдэ тыллары күрэхтэһээччилэргэ анаан тириэртилэр төрөппүт аҕата Алексей Уваровскай, үөрэппит учуутала, кылаас салайааччыта Анна Сивцева, таайа Петр Степанов уонна күрэх главнай судьуйата Иннокентий Охлопков.
Кыайыы туһугар хабыр хапсыһыылаах, кытаанах киирсиилээх күрэхпит түмүгүнэн, бастакы миэстэни кыргыттарга уонна уолаттарга Бүлүү Тыымпытыттан сылдьар спортсменнарбыт муҥутуур кыайыылаах аатын үрдүктүк сүктүлэр. Уолаттарга иккис миэстэни Сииттэ — 1 хамаандата, үһүс миэстэни Сангаар уолаттара эрэллээхтик ыллылар. Иккис миэстэни кыргыттарга Сангаар хамаандата уонна бочуоттаах үһүс миэстэни Сииттэ кыргыттара тигистилэр.
Тэрээһин түмүгүнэн наҕараадалааьын, номинациялары туттартааһын үөрүүлээх быһыыга ааста. Олус элбэх номинациялар туттарылыннылар. Ол курдук, Владислав Уваровскай бииргэ үөрэммит оҕолоро, учуутала, бииргэ төрөөбүттэрэ, төрөппүт кыыһын анал номинацията, чугас аймах — билэ дьонноро, бииргэ үлэлээбит учууталларын коллектива, табаарыстара бука бары ботуччу сууммалаах номинациялары анааннар күрэх кыттааччыларын улаханнык сэргэхситтэ. Кырдьык да болҕойон олорон волейбол оонньуутун өйдөөн көрдөххө, олус да азартаах, чахчы бу көрүҥү ис сүрэхтэн таптыыр, бэйэтигэр эрэллээх, сыаллаах — соруктаах буоллахха эрэ киһи онньуур эбит диэн сыаналыыгын. Биир сиргэ турбакка, күрэх саҕаланыаҕыттан бүтүөр дылы төбө, толкуй үлэлэригэр тиийэ, илии — атах тэҥҥэ хамсааһына олус туһалаах диэн астына көрөн, дуоһуйа сынньанан барар кыраһыабай спорт көрүҥэ буолара чуолкай эбит.
Онон сииттэлэр оҕобут, учууталбыт, аймахпыт, табаарыспыт аһаҕас турнирын күрэҕэ олус сэргэхтик ааспытыгар кыттааччыларыгар барҕа махтал тылларын тиэрдэбит уонна кыайыылаахтары өссө төгүл эҕэрдэлиибит.
Марианна Сивцева.