Улуу Кыайыы күнүгэр биир дойдулаахпыт «Кыһыл сулус» орден кавалера, «Кенигсберы ылыы иһин», «Германияны кыайыы иһин» мэтээллэрдээх Николай Николаевич Попов-Тэккэ сырдык кэриэһигэр туруоруллубут өйдөбүнньүк бэлиэҕэ «Дьүкээбил» түөлбэ олохтоохторо (сал. А.Н. Дьяконова) сибэкки дьөрбөтүн уурдулар. Олохтоох библиотека үлэһитэ Мария Обутова кылгастык саллаат туһунан ахтыы оҥордо.
Николай Николаевич 1902 с. төрүөх, сэриигэ Сииттэттэн от ыйын 9 күнүгэр 1942 с. ыҥырыллыбыт, дойдутугар олунньу 26 күнүгэр 1946 с. Кыайыы көтөллөөх эргиллэн кэлбитэ. Сэриигэ бойобуой сорудаҕы толорон «Кыһыл Сулус»орденынан наҕараадаламмытын туһунан кэргэнигэр Мария Николаевнаҕа сулууспалыыр чааһыттан үөрүүлээх сонун кэлбит. Бу туһунан «Кыым» хаһыат 12 нүөмэригэр, 1942 с. кулун тутар ый 23 күнүгэр бэчээттэммит.
2015 с. Кыайыы 70 сылын көрсө кини олорон ааспыт түөлбэтигэр саллаат төрөппүт уола Николай Николаевич Попов — РФ уонна СР искусстволарын үтүөлээх деятэлэ, Россия худуоһунньуктарын сойууһун чилиэнэ, үлэ бэтэрээнэ, Кэбээйи улууһа уонна Сииттэ нэһилиэгин бочуоттаах олохтооҕо аҕатыгар анаан стела туруорбута. Саллаат олорбут дьиэтигэр өйдөбүнньүк бэлиэ, уулусса аата иҥэриллибитэ. Сииттэ нэһилиэгин олохтоохторо биир дойдулаахтарын аатынан киэн тутталлар, өйдүүллэр, махтаналлар, сүгүрүйэллэр.
Мария Обутова, Сииттэ нэһ.