Хас биирдии нэһилиэккэ дьону аһынан-табаарынан хааччыйар маҕаһыыннар үлэлииллэр. Куокуй нэһилиэгэр сылдьан, “Күннэй” маҕаһыыны үлэлэтэр Игнатьевтар дьиэ кэргэннэрин кытта билистим. Үлэһит дьиэ кэргэн ийэтэ Анастасия Михайловна соторутааҕыта «Үлэ сыла» бэлиэнэн наҕараадаламмыт. Кинилэр дьиэ кэргэн урбаан суолугар хайдах үктэммиттэрин маннык кэпсиир:
– 1996 с. кэргэмминээн Игнатьев Аркадий Семеновичтыын сопхуоска үлэлии сырыттахпытына, сопхуоспут эстэн оҕолоох-уруулаах дьон биирдэ үлэтэ суох хаалан хаалбыппыт ыарахан этэ. Ол иһин 1998 сылтан Аркадий Семенович маҕаһыын арыйан үлэлэтэргэ туруммута. 2002 сылтан маҕаһыыны илиибэр мин ылбытым уонна күн бүгүҥҥэ диэри үлэлэтэ сылдьабын.
– Биһиги курдук суола-ииһэ суох сиргэ табаары таһар сүрдээх уустук буолуохтаах.
– Уустук бөҕө буоллаҕа. 2003 сыл ыам ыйын 3 күнүгэр Түгэнэ үрэҕэр суол алдьанан, табаар тиэммит 3 массыына сэттэ күнү быһа хаайтаран турбуппут. Ыам ыйын 9 күнүгэр бөртөлүөт кэлэн ылбыта. Массыынабыт таһаҕаһын тиэммитинэн туран хааллаҕа дии. Ол туран аны умайан хаалбыта.
2009 сыллаахха куоракка табаар ыла барбыппыт кэннэ олорор дьиэбит умайан хаалбыта. Ситинник улахан барыһа суох да буоллар үлэлиибит.
Тыа сиригэр урбаанынан дьарыктанар киһи тиэхиньикэтэ куруук өрөмүөннэммит, сүүрэр буолуохтаах. Хата кэргэним Аркадий Семенович тиэхиньикэҕэ, инженерияҕа дэгиттэр сыһыаннаах буолан ити өттүгэр улахан кыһалҕаны көрсүбэппит. Ас, табаар таһарга дьыл кэмиттэн көрөн таһаҕас таһар массыына, «Хайс», УАЗ, МТЗ, «Беларус», мотуордаах оҥочолор, олох туох да суол суоҕар «Бурааннар» сүүрэллэр.
– Маҕаһыыҥҥытын көрдөххө, сибиэһэй фрукта, оҕуруот аһа барыта баар эбит.
– Билигин нэһилиэккэ биир сүрүн маҕаһыын буоллубут, инньэ гынан эппиэтинэспит улахан. Ордук суол сабыллар кэмигэр. Ол кэмҥэ бэйэбит туох кыахтаахпытынан нэһилиэнньэни аһынан-таҥаһынан, араас табаарынан хааччыйа сатыыбыт. Куокуй, Кальвица оскуолаларыгар, уһуйааннарыгар сибиэһэй ас хайаан да баар буоларыгар кыһаллабыт. Маҕаһыыҥҥа икки атыыһыттаахпыт, биир үлэһиттээхпит.
– Анастасия Михайловна, дьиэ кэргэниҥ туһунан билиһиннэрэ түһүөҥ дуо?
– Бэйэбит түөрт оҕолоохпут, 6 сиэннээхпит, Сангаарынан, Хаҥалаһынан, куоратынан олороллор.
Биһиги сааһырдыбыт, нэһилиэнньэ көрдөбүлэ да улаатан иһэр. Онон улахан уолбут Аркадий көмөтө биһиэхэ улахан, кини аҕатын курдук тиэхиньикэҕэ сыстаҕас, аһы-үөлү бары быраабыланы тутуһан туран аҕалар. Биһигини эрэ буолбакка, Сангаар маҕаһыыннарын эмиэ хааччыйар, суолу-ииһи билэрин иһин киниэхэ эрэнэн, астарын-үөллэрин сакаастыыллар.
Аркадий Семенович саас аайы фрезанан нэһилиэнньэ хортуоскатын сирин тиэрэн, ыһарга хоруудалаан өҥө оҥорор, ону барытын бэйэтэ толкуйдаан сыбааркалаан айан таһаарар. Күһүн хара перегной буору, кумаҕы тиэйэн-таһан биэрэр. Ленточнай пилораманы үлэлэтэн, дьоҥҥо хаптаһыннарыны, лафеттарын бэлэмнээн биэрэр. Бэйэм «Луҥха долгуннара» үҥкүү түмсүүтүгэр баарбын, «Дууһабытынан эдэрбит» Бүтүн Арассыыйатааҕы волонтерство түмсүүтүн чилиэнэбин, «Кустук» түөлбэ салайааччытын солбуйааччыта буолабын.Ити курдук кыахпыт баарынан төрөөбүт бөһүөлэкпит олоҕун кытта тэҥҥэ барсан иһэбит.
