Бэс ыйын 6 күнэ — нуучча литературатыгар сүдү кылааты киллэрбит Улуу поэт А.С. Пушкин төрөөбүтэ 225 сылын туолла.
Бары норуоттар Пушкин сүдү талааныгар үйэттэн- үйэҕэ сүгүрүйэллэр, олорон ааспыт олоҕун кэрэ- бэлиэ күннэрин улахан бырааһынньык быһыытынан бэлиэтииллэр. Улуу поэт А.С. Пушкин айымньылара тыл эриэккэс кэрэтинэн кими баҕарар умсугуталлар, долгуталлар…
Бу күн библиотекаҕа «И продолжает жить в потомках вечный Пушкин» диэн кинигэ быыстапкатын билиһиннэриитэ тэрилиннэ. Оҕолор Пушкин олоҕун, айар үлэтин, айымньыларын туһунан билистилэр, остуоруйаларынан оонньуу, күрэх оонньоотулар, викторинаҕа кытыннылар.
Кыттыбыт оҕолор туоһу суруктарынан, минньигэһинэн күндүлэннилэр. Пушкин айымньыларын сүгүрүйээччилэргэ «Пушкины бары ааҕабыт» диэн хоһоон түһүлгэтэ тэрилиннэ. Сайя Сивцева, Лена Васильева, Наталья Гуляева, Петр Степанов, Аня Тимофеева, Самира Налыйдырова, Айал Левин поэт хоһооннорун дорҕоонноохтук аахтылар. Ааҕааччылар бары көлүөнэлэрэ Пушкиҥҥа маннык ытыктабыллаахтык, истиҥник сыһыаннаһан, кини сүдү талааныгар сүгүрүйэллэрэ махталлаах.
Ити курдук, үтүө иэйиилэри хоһоонунан уйгуурдан улуу поэппыт төрөөбүт күнүн бэлиэтээтибит.
Мария Обутова, Сииттэ нэһилиэгэ.