Тыайаҕа колхоз устуоруйата аһаҕас түмэлгэ

Тыайа нэһилиэгэр колхозтааһын кэмин историятын кэпсиир аһаҕас түмэл оҥоһулла турар.  Бу ТОС гранын «Күндээдэ» түөлбэ кыайан оҥорор. Стендэлэрин Е.Я. Архипова уруһуйунан «Ректайм» тэрилтэҕэ заказтанан, эбии баһылыкпыт Сидор Сидорович Дьяконов көмөлөһөн оҥоттордубут.

Нэһилиэккэ «Алаас» эбээ түмсүүтүн дьиэтин тиэргэнин  Андрей Николаевич Архипов уонна  Гаврил Васильевич Стручков дьиэ кэргэттэрэ кэҥэттилэр, бырааттыы Семён, Ньургун Дьяконовтар стендэлэри туруордулар, тиэргэн аанын Александр Степанович Ноговицын оҥордо, түөлбэ дьоно-сэргэтэ субуотунньугунан үлэлээтилэр.

Түөлбэ олохтоохторо
Архиповтар, Стручковтар тиэргэн кэҥэтэллэр
Бырааттыы Дьяконовтар стиэндэлэри туруораллар
Түөлбэ кэрэ аҥардара проект үлэтигэр

Манна улуус «Саҥа олох» хаһыатын архивыттан мунньуллубут иһитиннэриилэр киирдилэр. Маны сэргэ,  хонуу, көлө үлэтигэр туттуллубут экспонаттар хомуллан, ууруллан эрэллэр. Инникитин, бу аһаҕас түмэлтэн кэлэр көлүөнэ чинчийии үлэтин ылсан, эбии үөрэтэн, сайыннаран иһиэ диэн эрэллээхпит.

Екатерина Архипова.

Ааптар хаартыскаҕа түhэриитэ.