Сааскы ылааҥыга оҕо аймах хамсана оонньууругар, дьон-сэргэ хайыһардыырыгар анаан, Тыайаҕа каток оҥоһулунна уонна хайыһар суола тыргылынна. Нэһилиэкпит баһылыга Сидор Дьяконов көҕүлээн, өрүү да көхтөөх үлэһиттэр Иван Полятинскай, Николай Докторов тракторынан астардылар.
Манна учууталлар Василий Килижеков уонна Александр Аммосов үрдүкү кылаас «Волонтерское братство» түмсүүтүн уолаттарынаан, «Түмсүү» сынньалаҥ киинин директора Иван Гуляев, УСХ салайааччыта Александр Лугинов, күүс-көмө буолан ыраастаан, уу кутан хас да күн үлэлэрин быыһыгар дьарыктанан бүтэрдилэр.
Аҕатын туйаҕын хатарааччы, 2 саастаах кырачаан Дамир Килижеков тэҥҥэ сүүрдэ-көттө, кыаҕын иһинэн үлэлэстэ уонна катогу бастакы чинчийээччинэн уонна сыаналааччынан, астыммытын биллэрээччинэн буолла.
Екатерина Архипова.
Александр Лугинов хаартыскаҕа түһэриилэрэ.